Peshku ngordh “i vajosur”, ndotet rezervuari i Kasharit në Lushnje, akuzohen fabrikat e vajit
Nga OraNews Përditësimi i fundit 3 Mars 2022, 14:37
Dhjeta kuintal peshk ka ngordhur në Rezervuarin e Kasharit në Lushnje, ku mbarështuesi denoncon një masakër mjedisore. Ylli Kashari, fajëson derdhjet e pakontrolluara të fabrikave të vajit dhe dështimin e institucioneve të kontrollit për situatën.
Një pjesë e peshkut të ngordhur ka dalë mbi ujë, dhjetra kuintalë të tjera kanë rënë në fund të rezervuarit.
"Të gjithë të ngordhur."
Këto pamje vijnë nga rezervuari i Kasharit në Lushnje, nga ku vjen ky denoncim për masakër mjedisore.
"Nga dita që ra shi e këtej, erdhën ujërat se nuk ka pasur prurje."
Ylli Kashari që ka licencën për të mbarështruar peshk në këtë rezervuar fajëson derdhjet e pakontrolluara të fabrikave të vajit për këtë situatë.
"Vjen nga fabrikat e vajit të ullirit, nuk kam pasur ndonjë vit ngrodhje masive kështu. Pothuajse i gjithë peshku ka ngordhur."
Thotë se i gjithë peshku ka ngordhur, çka për të do të thotë miliona lekë të humbura për këtë vit.
Por çfarë është me e keqja sipas tij, paralizim i punës edhe për vitet në vijim.
"Të sëmur, është i helmuar. Do hedh rasatin tjetër këtë vit, do katër vjet të bëhet. Nuk ma merr mendja të hedh më, vetëm po vuri dorë shteti."
Ndotja e rezervuarit të Kasharit është denoncuar edhe pranë autoriteteve mjedisore dhe prokurorinë e Lushnjes, por deri më tani fajtori nuk është gjetur.
