Magnezi dhe shëndeti/ Ja çfarë thonë studimet për ankthin dhe gjumin...

Magnezi është një mineral i rëndësishëm për funksionimin normal të organizmit dhe ndikon në disa procese si funksioni i muskujve, presioni i gjakut, kontrolli i sheqerit në gjak dhe shëndeti i kockave.

Megjithatë, sipas ekspertëve, ai nuk duhet parë si një zgjidhje “mrekulli”, veçanërisht për ankthin dhe problemet me gjumin.

Në lidhje me ankthin, studimet tregojnë se magnezi mund të ketë një efekt të lehtë te personat me ankth të butë ose të përkohshëm. Megjithatë, provat shkencore mbeten të kufizuara dhe jo përfundimtare.

Specialistët theksojnë se në rastet e ankthit të rëndë, trajtimi profesional mjekësor është i domosdoshëm dhe suplementet nuk janë të mjaftueshme.

Edhe për gjumin, magnezi mund të ndihmojë lehtë tek personat që kanë vështirësi për shkak të stresit, por nuk ka prova të forta se përmirëson ndjeshëm çrregullimet e gjumit.

Shumica e studimeve tregojnë vetëm përmirësime të vogla ose jo të qëndrueshme.

Rekomandimet ditore për magnez janë rreth 310–360 mg për gratë dhe 400–420 mg për burrat, ndërsa shumë njerëz nuk e marrin sasinë e nevojshme vetëm nga dieta. Burime ushqimore përfshijnë perimet jeshile, arrat, farat, avokadon dhe çokollatën e zezë.

Ekspertët rekomandojnë kujdes edhe në përdorimin e suplementeve. Format si magnesium glycinate konsiderohen më të përshtatshme për ankthin, ndërsa disa forma të tjera kanë përthithje më të ulët ose përdoren për qëllime specifike.

Ata këshillojnë që suplementet të mos tejkalojnë dozat e rekomanduara dhe të përdoren vetëm pas konsultimit me mjekun, veçanërisht për personat që marrin trajtime të tjera mjekësore.