Problemet me semaforët, Bashkia ndërhyrje në 14 kryqëzimet kryesore
Nga OraNews Përditësimi i fundit 5 Nëntor 2012, 15:12
Bashkia do të ndërhyjë brenda kësaj jave në semaforët e 14 kryqëzimeve kryesore në kryeqytet. Drejtoresha e Transportit dhe Lëvizshmërisë në Bashkinë e Tiranës, Nereida Hoxha ka bërë të ditur se ndërhyrjet do të kryhen në kryqëzimet ku trafiku është më i madh dhe më pas do të vijohet me pika të tjera të Tiranës."Me fillimin e punës për implementimin e projektit të Qendrës së Kontrollit të Trafikut, Bashkia e Tiranës brenda kësaj jave bën me dije se do të ndëhyhet në 14 nga kryqëzimet kryesore të kryeqytetit. Këto janë pikërisht ato kryqëzime, të cilat vuanin nga mungesa e kontrollorëve ndër vite por që kanë edhe difekte të tjera, siç mund të jenë lampadarët apo shtyllat semaforike. Për këto 14 nyje është hartuar projekti i detajuar, është marrë miratimi nga Bashkia e Tiranës dhe kontraktori do të fillojë punën për zëvendësimin e elementëve të prishur brenda kësaj jave. Kjo është vetëm faza e fillimit të kësaj pune sepse do të vazhdojmë edhe me elementët e tjerë që janë pjesë e projektit të Qendrës së Kontrollit të Trafikut” tha Hoxha.Disa nga nyjet ku ndërhyrja do të nisë gjatë kësaj jave janë: Ura Teknologjike, Liceu, Gjykata e Lartë, kryqëzimi i rrugës së Dibrës me rrugën "Bajram Curri", stadiumi "Dinamo", rruga "Fortuzi", shkolla "Qemal Stafa", kryqëzimi tek ura e Ekspozitës, kryqëzimi i rrugës "Qemal Stafa" me rrugën "Bajram Çela", kryqëzimi i rrugës së Kavajës me rrugën "Sabaudin Gabrani", tek Unaza e Re, kryqëzimi Unazë - "Jordan Misja", Unazë - bulevardi "Zhan d'Ark" si dhe kryqëzimi "Dëshmorët e 4 Shkurtit" dhe rruga "Çamëria".
