Serbia miraton planin e marrëveshjes me Kosovën
Nga OraNews Përditësimi i fundit 27 Maj 2013, 07:18
Qeveria e Serbisë miratoi të dielën në mbrëmje planin e zbatimit të marrëveshjes për normalizimin e marrëdhënieve me Kosovën.Në një deklaratë për shtyp të qeverisë serbe thuhet se kryeministri i Serbisë, Ivica Daçiç e ka njoftuar shefen e politikës së jashtme të Bashkimit Evropian për këtë vendim.Beogradi vazhdon të kundërshtojë pavarësinë e Kosovës, por është pajtuar të përfshihet në një proces normalizimi të marrëdhënieve në përpjekje për t’u afruar me strukturat e Bashkimit Evropian.Qeveria e Kosovës, miratoi të premten planin e zbatimit të marrëveshjes me Serbinë, një plan rreth të cilit të mërkurën janë pajtuar në parim kryeministrat e të dyja vendeve, Hashim Thaçi dhe Ivica Daçiç. SSipas planit, zbatimi i marrëveshjes përfshinë disa elemente themelore siç janë, rregullimi i kuadrit ligjor të të dyja palëve, rrugët e krijimit të asociacionit të komunave me shumicë serbe në veri të Kosovë, çështjet e policisë e gjyqësisë dhe zgjedhjet për pushtetin lokal.Sipas planit tërë marrëveshja duhet të zbatohet brenda gjashtë muajve të ardhshëm.Marrëveshja rreth së cilës janë dakorduar të dy kryeministrat me 19 prill, u siguron serbëve në veri të Kosovës një shkallë të lartë të autonomisë.Marrëveshja është mbështetur nga diplomacia euro perëndimore e cila e sheh atë si një hap të të dyja vendeve drejt integrimeve evropiane.Komisioni Evropian miratoi propozimin që Serbisë t’i jepet data e fillimit të negociatave për anëtarësim në Bashkimin Evropian, ndërsa Kosovës ajo e negociatave për marrëveshjen e stabilizim asocimit.Por, vendimi i Këshillit të Ministrave të Bashkimit Evropian për këtë çështje që do të merret në fund të muajit qershor, varet nga zbatimi i marrëveshjes në terren.
