“Ligje ekspres” për marrëveshjen Kosovë-Serbi
Nga OraNews Përditësimi i fundit 26 Maj 2013, 09:20
Kërkesa e Brukselit ndaj Kosovës që të bëjë ndryshime legjislative në vend, në mënyrë që të mundësohet zbatimi i marrëveshjes Prishtinë-Beograd, konsiderohet kërkesë e tepruar, nga ana e deputetëve të Kosovës.Me arritjen e pajtueshmërisë ndërmjet kryeministrit të Kosovës, Hashim Thaçi dhe atij të Serbisë, Ivica Daçiç në Bruksel, mbi planin e zbatimit të marrëveshjes së arritur më 19 prill, e cila ka të bëjë me veriun, një prej kërkesave kyçe ndaj Kosovës është që të bëjë ndryshime dhe amendamentime të rreth 30 ligjeve.Bëhet fjalë për ligjin për amnistinë, policinë, gjyqësorin, qeverisjen lokale e të tjera, në mënyrë që t’i përshtaten zbatimit në terren të marrëveshjes, e cila ka të bëjë me krijimin e asociacionit të komunave serbe në veri, përfshirjen e strukturave paralele në institucionet kosovare...Madje, Brukseli zyrtar u ka dhënë afat institucioneve kosovare që shumë prej këtyre ligjeve duhet të ndryshohen dhe amendamentohen gjatë muajit qershor të këtij viti, shkruajnë mediat në Kosovë. Kjo gjë është shumë shqetësuese për deputetët kosovarë dhe për analistët politikë, pasi kjo do të ndodhë si me ligjet e miratuara me nxitim nga pakoja e Ahtisaarit.Deputetët, përfshirë edhe nga partia në pushtet (PDK), shprehen të shqetësuar se është Kosova ajo që për hir të Serbisë, në vazhdimësi po iu nënshtrohet kompromiseve të dhimbshme.
