Ulqini e Hafizi “rikthehen” në PS, Rama: Reflektova, janë vlerë e shtuar e Rilindjes

Ekip i rilindur, por me dy emra të vjetër në PS. Skuadrës socialiste në garën e 23 qershorit, i janë bashkuar Mimoza Hafizi dhe Musa Ulqini, dy personalitete më kontribut në selinë rozë, por të përjashtuar në listat e 2009-tës.Teksa i prezantoi si një vlerë e shtuar e ekipit të ri parlamentar, kreu i opozitës Edi Rama tha se ata janë dëshmi se si pavarësisht hatërmbejtjes, vijuan luftën për të rikthyer në pushtet PS-në.“Jam i kënaqur që në këtë ditë të veçantë të prezantoj dy pjesëtarë të skuadrës sonë por që vijnë nga një rrugëtim i kahershëm politik dhe nga një fazë e jetës politike me lëkundjet për shkak të zgjedhjeve të bëra në vitin 2009. Megjithatë dua të nënvizoj që përfshirja në skuadrën e Musa Ulqinit nuk është thjesht reflektimi im për një socialist 24 karat me të cilin politika na njohu dhe na bëri miq dhe politika na ndau përkohësisht për disa kohë kur Musai nuk u përshi në listën e 2009.Ky është edhe momenti për të nënvizuar respektin për kontributin e një pjesëtari të PS që pavarësisht se në atë kohë u ndje iu ngrënë në hakun e vet nuk doli në rrugën e mllefit në emër të egoizmit e sedrës por pavarësisht ndarjes me mua në këndvështrime kontribuoi për PS në komunitetin ku jeton.Por edhe më shumë se kaq se lista e deputetëve nuk ndërtohet si stenda e një muzeu, apo kapitulli i një historie, Ulqini vjen sot si një vlerë e shtuar në atë pjesë të patjetërsueshme të ballafaqimit zgjedhor. Mimoza Hafizi nuk u përfshi dhe pse ishte anëtare e PS.Zgjodhi të rrinte në PS jo me mllef, por me arsyet e veta mu kundërvu pa e shkelur asnjëherë etikën, por pa e lënë asnjëherë bosh vendin si anëtare e PS në raport me njerëzit e kësaj familje, në raport me detyrën e saj dhe detyrimin përkarshi kësaj familje politike” tha Rama.Ish kreu i PS në Tiranë, Musa Ulqini, që do kandidojë në Elbasan dhe ish anëtarja e kryesisë së PS, Mimoza Hafizi që do kandidojë në Shkodër teksa vlerësuan rikthimin në listat e PS, u shrehën se përfaqësimi në PS është përtej interesit vetjak.

 “Katër vjet më parë, kur nuk u bëra më pjesë e përfaqësimit politik të Partisë Socialiste në Kuvendin e Shqipërisë, pavarësisht nga emocionet që përjetova, për asnjë çast unë nuk vura në dyshim qenien time si pjesë e familjes politike, ku kam kontribuar e kontribuoj që në ditën e parë të themelimit të saj. Kjo, sepse unë kam besuar dhe vazhdoj të besoj fort në vetë thelbin e ekzistencës së partive politike në demokracitë parlamentare.

 Unë besoj se bashkimi dhe angazhimi vullnetar në një parti politike rreth një ideje, çështje, kauze apo alternative është përtej një interesi vetjak, sado i rëndësishëm qoftë ai, sepse është vetëm në këtë mënyrë qytetarët e angazhuar politikisht mund të kontribuojnë që përmes zgjedhjeve elektorale t’i realizojnë në praktikë këto ide, çështje, kauza apo alternativa duke i shërbyer një interesi më të madh, interesit publik. Unë besoj se sot Shqipëria e ka të domosdoshme ndryshimin, që vjen përmes rrotacionit politik” u shpreh Ulqini.

“Lidhja ime me PS-në tashmë është e gjatë në kohë dhe shumë e pasur  në aktivitet qoftë politik, qoftë organizativ në bashkëpunim me kryetarin, me aktorët kryesorë të Partisë Socialiste dhe me gjithë militantët jo vetëm në Shkodër dhe në Tiranë, por anembanë vendit. Nisur nga njohje shumë e detajuar desha të theksoj dy gjëra:

E çmoj pa masë këtë strukturë gjigande që quhet Partia Socialiste e Shqipërisë. Ndihem shumë e nderuar për këtë ftesë që të jem pjesëtare në Skuadrën për Rilindjen Shqiptare, në këtë transformim shumë historik të vendit tonë, transformim që me meritë e ka marrë emrin Rilindje e Shqipërisë. E, veçanërisht, meqë është fjala për qytetin e Shkodrës, një qytet ku unë jam lindur dhe rritur dhe natyrshëm e dua dhe natyrshëm kam detyrime për një përfaqësim sa më dinjitoz të këtij qyteti në parlamentin shqiptar” tha Hafizi.

Me Hafizin dhe Ulqinin, Rama theu traditën e e prezantimit të kandidatëve të rinj ditëve të diela, kjo ndoshta sepse koha shrëngon, pasi në 6 maj lista e kandidatëve duhet të depozitohet në KQZ.