Reshjet e shiut, KESH: Përmirësohet situata në kaskadën e Drinit
Nga OraNews Përditësimi i fundit 29 Tetor 2012, 12:01
Reshjet e rëna ditët e fundit përmirësojnë situatën energjitike në vend. Sipas Korporatës Elektroenergjetike Shqiptare reshjet e rëna me intesitet në të gjithë vendin kanë përmirësuar kuotat në kaskadën e Drinit.Kështu sipas KESH-it, niveli i ujit në HEC-in e Fierzës është rritur me disa metra në krahasim me disa ditë më parë dhe ka arritur në nivelin 259.81 metër nga 254.99 metra që ka qenë para reshjeve. Shiu i rënë ka pasur ndikim gjithashtu edhe në shtimin e prurjeve të cilat kanë arritur 650 metër kub në sekondë nga 74 m3.Gjithashtu KESH thekson se HEC-i i Komanit është në nivelin 174.36 metër dhe prurjet anësore janë 500 metër kub në sekondë. Ndërsa në hidrocentralin e Vaut të Dejës niveli i ujit është 74.74 metër dhe prurjet anësore 150 metër kub në sekondë.Rritja e nivelit në hidrocentrale si rezultat ka sjellë edhe rritje të prodhimit të energjisë elektrike dhe ulje të importit. Aktualisht sipas KESH në vendin tonë po prodhohet 10 milon Kw energji elektrike nga 4 milion Kw që prodhohej vetëm një javë më parë dhe po importohet vetëm 8 milion Kw.Sipas meteorologëve reshjet e shiut do të vijojnë edhe për disa ditë duke ndikuar kështu në përmirësimin e mëtejshëm të situatës së prodhimit të energjisë në vend.
