Panariti takon ambasadorët e Italisë dhe Greqisë, vlerësohet marrëveshja për TAP-in
Nga OraNews Përditësimi i fundit 15 Shkurt 2013, 12:38
Ministri i jashtëm Edmond Panariti është takuar sot me ambasadorët e Italisë dhe Greqisë, Massimo Gaiani dhe Leonidas Rokanas ku është përshëndetur nënshkrimi i marrëveshjes ndërqeveritare për ndërtimin e gazsjellësit "Trans Adriatic Pipeline" TAP.Gjatë takimit u vlerësua se kjo arritje është rezultat i një bashkëpunimi të shkëlqyer mes qeverive të të tre vendeve ndërsa u ritheksua edhe njëherë vijimi i bashkëpunimit në të ardhmen, në të gjitha drejtimet.Bashkëbiseduesit evidentuan rëndësinë strategjike dhe ekonomike të këtij projekti madhor, jo vetëm për tre vendet, por për gjithë rajonin tonë dhe vetë sigurinë energjetike të Evropës.Ministri Panariti, theksoi rëndësinë e përpunimit të një agjende të përbashkët, mes tre vendeve, për çuarjen përpara të projektit TAP, i cili do të jetë një urë e rëndësishme që do të lidhë më shumë Shqipërinë me dy vende anëtare të BE-së, Greqinë dhe Italinë, vendet e rajonit mes tyre, si dhe do të forcojë më tej vizionin e përbashkët për bashkëpunim dhe integrim evropian.
