FRD: Berisha të provojë akuzat ose të përballet me drejtësinë
Nga OraNews Përditësimi i fundit 15 Shkurt 2013, 12:03
Partia “Fryma e re Demokratike” ka reaguar sot pas akuzave të kryeministrit Berisha ndaj kreut të saj Bamir Topi në mbledhjen e KRRTRSH-së.Në një deklaratë për shtyp, FRD-ja thekson se kryeministri Berisha duhet të provojë akuzat ose përndryshe do të përballet me drejtësinë.“Kryeministri në ikje Sali Berisha, i trembur nga vota popullore kundër tij dhe verdikti qytetar i 23 qershorit kundër modelit të tij spekullues e baltosës, deklaroi sot se kryetari i FRD-së Bamir Topi ka marrë tri lejë ndërtimi nga ish-kryetari i Bashkisë Tiranë. Në respekt të publikut dhe përgjegjësisë qytetare Bamir Topi i kërkon publikisht kryeministrit në ikje të bëjë publike dokumentet që pretendon, përndryshe ai do të përballet me dyert e drejtësisë me akuzën e shpifjes dhe abuzimit me detyrën”thuhet në deklaratë.FRD thekson më tej se kryeministri është i frikësuar nga kritikat në rritje perëndimore, nga zhgënjimi masiv qytetar, nga mosmbajtja e premtimeve, gjëndja e vështirë ekonomike si dhe nga rritja e dukshme politike e Frymës së Re Demokratike prandaj dhe nuk ka më çfarë t`ju ofrojë qytetarëve përvecse metodat që ai njeh e praktikon më mirë, baltosjen, fyerjen dhe denigrimin ndaj kundërshtarëve dhe kritikëve politikë.“Praktika e tij e spekullimit pa fakte dhe pa baza përbën një nga sëmundjet më negative të tranzicionit dhe një mentalitet stalinist të denjë për kohën kur ai ishte militant dhe drejtues në Partinë e Punës. Bamir Topi është një nga qytetarët politikanë që nuk ka marrë ende as të drejtat e pronësisë familjare të trashëguara dhe që njihen nga ligji, ndërkohë që vetë kryeministri dhe oborri i tij përfaqësojnë shtresën e re të pronarëve të rinj të pushtetit, të krijuar kryesisht për shkak të vendimmarrjes klienteliste familjare dhe politike. Nga ana tjetër z.Topi i rikujton edhe njëherë qytetarëve shqiptarë se sa e rëndësishme është që shoqëria shqiptare, shteti dhe institucionet shqiptare të ndahen me votë të lirë dhe masive nga sistemi baltosës dhe i korruptuar që ka krijuar dhe mban në këmbë kryeministri në ikje Sali Berisha” përfundon deklarata e FRD-së.
