Greva e ish të përdjekurve, AI thirrje qeverisë për dialog
Nga OraNews Përditësimi i fundit 17 Tetor 2012, 10:03
Organizata e të drejtave të njeriut Amnesty International i bëri thirrje sot qeverisë shqiptare të takohet me grevistët për të vendsour dialogun dhe për të zgjidhur shqetesimet e tyre. Këtë thirrje Amnesty International e bëri para pak çastesh përmes një deklarate, ku përmend grevën e urisë së ish-të përndjekurve dhe rastet kur dy prej tyre i vunë flakën vetes, si edhe moshën dhe dobësinë e grevistëve.Amnesty përshëndeti takimin e parë të premten e kaluar mes grevistëve dhe Presidentit Bujar Nishani, që organizata vë në dukje se u krye vetëm pas ndërhyrjes së Ambasadës Amerikane dhe delegacionit të Bashkimit Evropian.Por shton se Kryeministri Sali Berisha ka vazhduar të theksojë se protestuesit janë të motivuar politikisht. Amnesty International i bën thirrje zotit Berisha që t`u japë zgjidhje shqetësimeve të tyre dhe të garantojë që kompensimet për ta të paguhen menjëherë.Ish të përndjekurit politik kanë hyrë sot në ditën e 25-të të grevës së urisë, ndërsa nata e shkuar ka qenë shumë e vështirë për ta për shkak të reshjeve të dendura të shiut. Pas daljes së një tjetër grevisti një ditë më parë, tashmë janë vetëm 7 ish të burgosur politik të cilët po vazhdojnë grevën në çadra.Po sot Komisioni Parlamentar për Çështjet Ligjore thirri në një seancë dëgjimore ministrin e Drejtësisë, Eduard Halimi për të raportuar lidhur me dëmshpërblimin e ish-të përndjekurve politikë, seancë kjo e cila erdhi pas një kërkesë të deputetëve të Partisë Socialiste.Ndërsa ka raportuar situatën e dëmshpërblimit për këtë shtresë të shoqërisë, Ministri Halimi tha se gjatë kësaj kohe kanë marrë këstin e parë të dëmshpërblimit 11 759 ish të përndjekur, ndërsa është dhënë kësti i dytë për ata të cilët janë mbi 65 vjeç.Pas raportimit të situatës, deputetët e opozitës, të cilët e thirrën në seancë dëgjimore ministrin e drejtësisë nuk kanë bërë asnjë pyetje sa i përket këtij raporti.
