Vonesa për buxhetin 2014, PD: Qeveria do të varfërojë 100% të shqiptarëve

Nga OraNews Përditësimi i fundit 11 Dhjetor 2013, 12:02

Projekti i ri buxhetor dhe politikat e taksave, janë jo në mbështetje të 95% të shqiptarëve, por kundër interesave të 100% të tyre. Kështu deklaroi ish-ministri i Ekonomisë, Florion Mima, lidhur me paketën fiskale të prezantuar vetëm një ditë më parë nga Kryeministri Edi Rama. Ai deklaroi se Partia Demokratike do të çpojë me shifra, fakte dhe argumente këtë tullumbace demagogjike dhe propagandistike të Kryeministrit ,sapo dokumenti buxhetor dhe politikat e shkruara të vijnë në Kuvend.“Në Ligjin Nr. 9936, datë 26.6.2008 “Për menaxhimin e sistemit buxhetor në Republikën e Shqipërisë”, neni 29, paragrafet 2 dhe 4, thuhet se: “Kryeministri i vendit, miraton buxhetin në qeveri deri më datën 25 tetor dhe se, brenda datës 1 nëntor, ai duhet t’i jetë paraqitur Kuvendit”. Sot është data 11 dhjetor dhe jo që në Kuvend nuk ka mbërritur asgjë, por as në qeveri nuk është miratuar projekt-dokumenti më i rëndësishëm ekonomik, financiar, social dhe zhvillimor i vendit. Ajo çka publiku ka dëgjuar deri më sot, është kënga me refrenin e çakorduar, se 95% e shqiptarëve do të paguajnë më pak taksa, këngë e cila u këndua, u dëgjua dhe u duartrokit solo edhe në shfaqjen e mbrëmshme të këngëtarit, kompozitorit, dirigjentit dhe spektatorit të vetëm të shfaqjes, kryeministrit të vendit. Partia Demokratike do të çpojë me shifra, fakte dhe argumente këtë tullumbace demagogjike dhe propagandistike të kryeministrit sapo dokumenti buxhetor dhe politikat e shkruara të vijnë në Kuvend. Paraprakisht, vërejmë se projekti i ri buxhetor dhe politikat e taksave, janë jo në mbështetje të 95% të shqiptarëve, por kundër interesave të 100% të tyre. Ky është buxheti i demagogjisë, i pasigurisë, i terrorit mbi biznesin dhe konsumatorin, është buxheti i mllefit dhe urrejtjes ndaj shtresës së mesme dhe buxheti i varfërimit të mëtejshëm të të varfërve” tha ai.Sipas Mimës projekt i ri buxhetor dhe politikat e taksave janë një rrënim për qytetarët shqiptarë dhe dekurajim për investitorët.“Me këtë akt, do të varfërohen më shumë të tërë konsumatorët shqiptarë, do të varfërohen qindra mijëra nxënës dhe studentë, do të goditen pronarët e ambienteve të bizneseve të vogla, të cilët, atë që gjoja do të fitojnë nga taksa më e ulët mbi biznesin e vogël, do ta lënë shumëfish nga rritja e tatimit mbi pasurinë. Do të varfërohen mbi një milion konsumatorë të produkteve të duhanit dhe mbi çerek milionë shqiptarë që përdorin karburantin për lëvizjen me automjetet e tyre.Me këtë akt do të goditen të gjitha bizneset e mëdha, të cilëve, do t’u duhet të paguajnë më shumë për të kënaqur premtimet ekstravagante të qeverisë për gjoja taksim të drejtë e të ndershëm. Atyre do t’u duhet të paguajnë më shumë duke kyçur në sirtar planet e tyre për më shumë investime, më shumë eksport, më shumë punësim. Projekti i ri dhe paketa shoqëruese fiskale do të rrënojnë edhe atë avantazh modest krahasues që ekonomia dhe vendi ynë u ofronin investitorëve të huaj të drejtpërdrejt. Ne jemi këtu për të qëndruar dhe do të qëndrojmë fort në mbrojtje të interesave të të gjithë shqiptarëve” përfundoi Mima.Të martën Kryeministri Edi Rama i paraqiti biznesit programin ekonomik dhe paketën e re fiskale, përmes të cilës qeveria synon të rimëkëmbë ekonominë dhe të vërë nën kontroll financat publike të vendit. Zoti Rama tha se drafti është dakortësuar edhe me partnerët ndërkombëtarë.Kreu i qeverisë deklaroi se pavarësisht situatës së vështirë, qeveria i ka qëndruar premtimit të saj për të ulur taksat për shumicën dërrmuese të shqiptarëve.Rama tha gjithashtu se lehtësim do të ketë edhe për biznesin e vogël, i cili do të çlirohet nga taksa vendore dhe do të paguajë një tatim fitimi më të ulët. Ndërsa për kompanitë e mëdha, zoti Rama tha se do të ketë një rritje të lehtë të tatimit mbi fitimin, por që sipas tij nuk do të rëndojë mbi kompanitë pa iu shlyer më parë borxhin.