Islami: Sindromi i frikës nga vdekja rrezikon raportet e Ramës me opozitën

Raportet mazhorancë-opozitë do të jenë vendimtare për marrjen apo jo të statusit të kandidatit në BE, në dhjetor. Kështu ka deklaruar Kastriot Islami, deputet tashmë në radhët e PD, në intervistën e mbrëmjes në RTV Ora News me drejtorin e Informacionit Patrik Sadikaj. Duke ju referuar deklaratave të përfaqsuesve të rëndësishëm të BE gjatë qëndrimit dyditor të kryeministrit Rama në Bruksel, Islami vlerësoi se Brukseli e priti qeverinë e re, por nuk ka harruar qëndrimet e saj në raport me integrimin sakohë ajo ishte në opozitë. Megjithatë sipas Islamit, Brukseli zyrtar është munduar ta shohë pozitivisht të projektuar nga e ardhmja duke lënë kështu dhe detyrat respektive si, marrëdhënie konstruktive me opozitën, lufta kundër korrupsionit, si dhe vazhdimin e një politike konstruktive në rajon. Duke mbetur tek politika e jashtme rajonale, Islami tërheq vëmendjen se Rama në programin e tij të qeverisë nuk ka asgjë konkrete për marrëdhëniet me fqinjët.“Duhet të kemi parasysh që që në momentin që Shqipëria është futur në rrugën e anëtarësimit në BE, Brukseli i ka të gjitha informacionet se çfarë ndodh këtu nga zyra që ka në Tiranë. Deri te informacionet e fundit, sesi ka filluar parlamenti shqiptar, përplasjet dyditore mes palëve deri tek deklarata e Kryeministrit lidhur me çështjen e dhunës ndaj opozitës. Në Bruksel është pritur qeveria e re, por nuk është harruar qëndrimi i opozitës gjatë mandatit të kaluar, veprimet radikale deri te bllokimi i tre ligjeve. Në Bruksel janë munduar ta shohin pozitivisht të projektuar nga e ardhmja, duke ja dhënë si mesazhe se çfarë kërkohet nga qeveria e re. Në parim Barroso ka thënë se mund të jetë dhjetori, pasi teknikisht me miratimin e tre ligjeve është mbaruar e gjithë puna dhe këtu Barroso dhe të gjithë të tjerët kanë lavdëruar punën e mirë të qeverisë së mëparshme. Kanë lavdëruar pjesmarrjen e partive politike në zgjedhje dhe kalimin e butë të pushtetit. Ata kanë dhënë dhe një mesazh tjetër, duke pasur parasysh retorikën e nxirjes së realitetit, duke projektuar se gjithçka fillon nga zero, ata kanë dhënë mesazhin e vijimësisë, ku palët kanë dhënë rolin e tyre dhe kanë përcaktuar detyrat për të ardhmen. Kryesoja është marrëdhënia mes palëve në parlamentin shqiptar, kërkojnë proçes gjithpërfshirës në parlament. Pra nuk bëhet fjalë për 1 milion shuplaka që do godasin opozitën. Do jetë ky proçes që do përcaktojë nëse do jetë dhjetori apo më vonë, për marrjen e statusit kandidat. Proçesi i dytë i rëndësishëm është lufta kundër korrupsionit, madje një nga eurodeputetët , zoti Kaçin i ka kërkuar Ramës ta bëjë dhe brenda partisë së tij. E rëndësishme është se është ngritur çështja e vazhdimit të një politike konstruktive në rajon, Brukseli e shikon të gjithë rajonin e Ballkanit Perëndimor në BE, por duke bërë një ushtrim paralel të marrëdhënieve dypalëshe apo shumëpalëshe mes vendeve të rajonit. Në programin e PS nuk ka asgjë konkrete për marrëdhëniet me fqinjët. Janë harruar marrëdhëniet me Maqedoninë, Malin e Zi, Kroacinë, Serbinë. Shpresoj të jetë një lapsus, lajthitje e programit. Pasi duke lexuar fjalimin e zotit Meta në 2009 kur krijuan qeverinë me PD, ka qenë shumë i qartë sa i përket politikës që duhet të luajë Shqipëria në rajon, madje ka vënë një theks të rëndësishëm edhe për një marrëdhënie të caktuar me Serbinë”deklaroi Islami.

Ndonëse të shkrirë tashmë në një qeveri, Islami vlerëson se nuk ka rakordim të programeve të PS-LSI. Sipas tij në programin e miratuar në parlament janë ruajtur terësisht formulimet e PS me disa tërheqeje të saj nga premtimet elektorale.

“Nëse do analizonim rakordimin e dy programeve para 1 prillit kanë qenë  distante në mënyrë të qartë mes tyre si për taksën progresive, cështjen e 1 milionë të papunëve, shëndetësinë falas. Gjatë kësaj kohe janë ruajtur formulimet e PS, për shëndetësinë falas ka tërheqje megjithëse Rama insistoi në deklaratën e tij se do ta bëjë, sikundër dhe për taksat. Meta është treguar i kujdeshëm për të mos u ballafaquar. LSI ka një dallim edhe për arritjet në fushat e caktuara, kritikohej MPJ kur në 90% të kohës ka qenë e drejtuar prej LSI.  Ose sektori i ekonomisë dhe energjitikës, edhe këtu 95% të kohës është drejtuar nga LSI. LSI dhe Meta e kanë lënë në dorë të PS të vazhdojë të ruajë retorikën e saj, duke i dhënë më shumë rëndësi marrjes së Ministrive dhe arritjeve në to” u shpreh ai.

Ndërsa sjell në vëmendje një deklaratë të Kryeministrit Rama ku shprehet “Bëj politikë për të luftuar idenë e vdekjes”, Islami e sheh si të rrezikshme këtë sindromë të Kryesocialistit në jetën politike, e në mënyrë të veçantë në raportet me opozitën. Sipas tij në situata dhe në një debat të fortë në parlament  Rama rrezikon të shkasë në një retorikë dhune ndaj opozitës. Rasti më flagrant, thekson Islami  ishte gjatë diskutimit të programit në Parlament, që kulmoi më pas dhe me heqjen e portretit të Presidentit Nishani nga zyra e tij.  

“Në fjalën time u tregova i kujdesshmëm, duke u marrë më shumë me programin, pasi njerëzit e mëdhenj merren me çështje, ato mesatar me gjëra më të vogla, ndërsa njerëzit e vegjël merren me njerëzit.  Rama dëgjoi dy ditë dhe gjithë reagimi ishte të ngacmonte figurat kryesore të opozitës, pasi si duket i kishte djegur diskutimi dhe kishin prekur pika delikate të programit, përbërjes dhe strukturës së re të qeverisë. Në vend se të jepte shpjegime për publikun ai u mor duke ngacmuar individualisht persona të ndryshëm. Kjo lidhet me personin e tij, është person cinik dhe vuan nga  një kompleks inferioriteti, kur i jepet mundësia bëhet agresiv dhe nuk kontrollon dot veten. Ka dhënë një intervistë ku ka shprehur se ka frikë të madhe nga vdekja, dhe ka thënë do merrem me politikë për ta tejkaluar këtë frikë. Kjo është sindromë që nuk kurohet dot nga asnjë lloj mjeku. Për disa persona duket e lehtë, por kjo është shumë e rëndë, do të thotë se veprimet politike të tij drejtohen nga ky lloj sindromi. Shpresoj të mos shkojë në veprime revanshiste, por në dy seanca në parlament nuk e ka kursyer retorikën e dhunës. Këtë gjë ai e ka bërë dhe në PS. Shikoj rrezik se në situata dhe në një debat të fortë në parlament do të aplikojë këtë retorikë. Atij i kishte djegur fakti se është Kryeministër me mandatet e LSI.E njëjta gjë ndodhi me heqjen e  fotografisë së Presidentit të Repulikës, është rast i paprecedentë dhe unik. Kjo do të thotë se është futur në konflikt politik me Presidentin. Rama kur kërkon të godasë një personazh të rëndësishëm apo institucion e bën përmes medias pranë tij deri tek presionet që sipas tij mund ta çojnë  Presidentin në dorëheqje. Mesazhi është shumë negativ, një orë pa u tharë boja e betimit tek Presidenti shkon dhe heq fotografinë e tij, ose një ditë para se të shkonte në Bruksel. Këtu zoti Meta ka një qëndrim ndryshe, ai gjeti një zgjidhje të ndërmjetme duke thënë se do ti mbajë të dy. Kjo qeveri është me dy plane, koka, trupa, dy veprime dhe se di si do shkojë funksionaliteti i saj. 5 Ministra  do e mbajnë në zyrë foton e Presidentit,  pjesa tjetër jo” tha më tej deputeti demokrat.

Nëse qeverisja Rama-Meta do jetë e vështirë apo jo, nisur dhe nga trajtimi që mediat ndërkombëtare kanë bërë, rasti më i fundit ai i gazetës "Neue Zürcher Zeitung", Islami dha këtë koment:

“Gazeta "Neue Zürcher Zeitung". 70% e artikullit ishte një superlavdërim që i bëri Ramës, disident që në ’85 , fakt që asnjë se kishte ditur deri më tani po kjo është e zgjidhshme përmes kompanive lobuese që  paguan. Në fund thotë se Rama ka hequr dorë nga idealet e tij të mira për shkuar në koalicion me Metën. Meta është politikani më i korruptuar. Është njeriu që ka krijuar sistemin më të korruptuar dhe kjo ja vështirëson Ramës luftën kundër korrupsionit dhe hapjen e 300 000 vendeve të reja të punës. Po ashtu dhe “The Economist” kishte një artikull ku ishte një shkrim që Rama del një figure e mirë,  por që mund ta hedhin në erë të përjashtuarit, qoftë  figurat me përvojë të PS apo dhe vetë aleatët që u lanë mënjanë.  Me këto të dyja po vërtetohet një tjetër artikull i shkruar direkt pas zgjedhjeve.Të tre artikujt janë në të njëtën linje, Rama ka fituar, ka mundur Berishën, por është i kapur peng nga Ilir Meta, garda e vjetër në PS. Ky është një supernjeri dhe gjithë fajin ja kanë këta të  tjerët. Nuk mund të abuzoj, por të tre artikujt kanë një bosht të përbashkët” përfundoi Islami.