Verifikimi i mandateve, Bogdani: Gati nesër, Berisha Kryeministër mbarëshqiptar

Deri nesër para nisjes së seancës së radhës parlamentare Komisioni i Përkohshëm për Verifikimin e Mandateve do të ketë gati raportin për t’ia paraqitur Kuvendit, hap ky që pason betimin e 140 deputetëve të legjislaturës së re. Gerti Bogdani, një prej 46 deputetëve të PD, por dhe anëtar i këtij Komisioni deklaroi për Ora News se gjithcka po shkon normalisht, ku ashtu si parlamenti edhe Komisioni ishte i plotë, nuk kishte bojkot. Zoti Bogdani ka ndarë dhe përshtypjet lidhur me seancën e mbajtur pasditen e sotme.“Zyrtarisht seanca e sotme shënoi rrotacionin politik dhe nisjen e debatit, sa i përket debatit parlamentar dhe politikës parlamentare. Nuk është se debati politik i ka lënë të qetë shqiptarët edhe gjatë sezonit të pushimeve. Ajo që më bëri përshtypje është fakti se në terësi fjalimi i zotit Dokle nuk u duartrokit nga deputetë të mazhoancës. Në një pjesë të fjalimit të tij ai nënvizoi se është një parlament që fillon ndryshe nga të tjerët, pa bojkot. Këtë ndryshimi e sjell e djathta dhe PD. Sot ishte vetëm një ceremoni hapjeje. Ishte e interesante të shikoje zotin Rama në parlament. Kam përshtypjen se do japë dorëheqjen e mandatit me zgjedhjen si Kryeministër, megjitahtë mbetet për tu parë nëse do e bëjë. Sa i përket Komisionit, ka një limit kohor, deri nesër para seancës parlamentare duhet të kemi përfunduar punën tonë. Relacioni i përcillet më pas kuvendit dhe bëhet dhe betimi i deputetëve. Kësaj here komisioni ishte i plotë, nuk pati debate” tha ai.

Ndërsa e hëna ishte një ditë e ngjeshur me zhvillime politike, ku dominuan edhe ato brenda PD, Bogdani duke iu referuar mbledhjes së grupi parlamentar demokrat tha se ishte me rëndësi shpalosja e një plani të përgjithmëm tek mënyra sesi do të bëhet opozitë.Konstruktivë për çështje madhore të vendit, por dhe të fortë përmes denoncimeve me fakte kontrete të çdo abuzimi nga qeverisja e re, kjo pritet të jetë dhe opozita e re sipas Bogdanit.

“Ishin momente të rëndësishme në fillimin e grupit parlamentar si opozitë, për të dhënë tonte e duhura, për të shpalosur një plan të përgjithshëm, duke pasur parasysh trashëgiminë që kjo mazhorancë u lë qytetarëve, në funksion të integrimit të vendit. Duke pasur parasysh këtë, fakti se ne do jemi opozitë konstruktive kur bëhet fjalë për të ardhmen e vendit, tregon një diskurs pozitiv. Pra një opozitë konstruktive për interesa madhore të vendit, por  dhe një opozitë e fortë për të denoncuar çdo shkelje të kësaj qeverie, pasi  janë reforma të rëndësishme që nuk mund të zhbëhen, janë premtime të shumta të Ramës rrënjësisht të parealizueshme, janë antiglobale nga mënyra si parashtrohen. Do jemi në krah të qytetarëve, punonjësve të administratës publike.  Administrata ka nevojë për konsolidim, por jo për ta hedhur në rrugë siç ka deklaruar zoti. Rama. PD do jetë e fortë në zërin e saj brenda  Kuvendit dhe jashtë tij.Grupi parlamentar i PD ka një cilësi të madhe. Kjo është shumë e rëndësishme në të bërit opozitë, nuk do bëjmë zhurmë parlamentare siç jemi mësuar të shohim por një opozitë konstruktive me fakte” theksoi Bogdani.

E ndërsa pritet votëbesimi i qeverisë së re, Bogdani ka ndarë shqetësimin lidhur me “kodin e heshtjes” së kabinetit Rama, që sipas tij thyen traditën e krijuar nga mazhoranca e djathtë, ku komunikimi i hapur me median ishte prioritet.

“Ky është një shqetësim për gazetarët në radhë të parë, për ne si opozitë dhe për vetë qytetarët shqiptarë. Shqipëria dixhitale nuk është thjeshtë një nocion teknik. Nëse zoti.Rama e mbyll qeverinë  e tij, nuk është çudi pasi ai pati mbyllur dhe PS. Por nuk është problem që shqetëson opozitën, më shumë se mediat dhe qytetarët shqiptarë" nenvizoi ai.

Në vijim të intervistës Bogdani tha se së shpejti nis riorganizimi i PD dhe analiza e humbjes së zgjedhjeve të 23 qershorit, nga ku priten të nxirren konkluzione të rëndësishme. Bogdani  tha se në politikë nuk ka luftë brezash por mentalitetesh, e kur bëhet fjalë për PD sipas tij  pasja e një konkurencë të shëndetshme brenda brezave, vetëm sa rrit rezultatet.

“Riorganizimi dhe analiza e zgjedhjeve fillon në javët e ardhshme. Është me rëndësi të shihen arsyet e reazultateve të 23 qershorit, për të bërë korrigjimet e mundshme dhe për të bërë një mobilizim për zgjedhjet e ardhshme. Nuk ka luftë brezash në PD, por luftë mentalitetesh. Sot në politikën shqiptare ke lider që kanë vite experience, por që nga mentaliteti janë shumë të rinj sesa ata që e militojnë veten si të rinj. Personi që e ka mentalitetin më të ri në PD është Kryeministri Berisha i sapodorëhequr. Kur konkurenca është e shëndetshme edhe rezultatet janë më të mira” tha më tej deputeti demokrat.