Në ujë të ftohtë për kryqin, besimtarët ortodoksë kremtojnë ditën e Ujit të Bekuar
Nga Ora News Përditësimi i fundit 6 Janar 2023, 11:00
Qindra besimtarë Ortodoksë në mbarë vendin kanë kremtuar ditën e Ujit të Bekuar.
Anembanë vendit ata janë hedhur në lumenj e në det për të kapur kryqin që simbolizon pagëzimin e Jezu Krishtit në ujërat e Lumit Jordan. Dita e ujit të Bekuar është një ndër festat më të mëdha të besimtarëve Ortodoksë.
Pas riteve në kishë, besimtarët e krishterë në Berat iu drejtuan lumit Osum.
Në një anë banorët e Goricës dhe në anën tjetër ata të Mangalemit.
7 të rinj nga të gjitha lagjet e qytetit të Beratit, u hodhën në ujin e ftohtë të lumit për të pritur hedhjen e kryqit.
Me kryqin në dorë doli 22-vjeçari Vasil Tapija, nga "Gorica"
Siç e do tradita ai u vlerësua me një shumë simbolike nga Mitropolia e Beratit dhe më pas me kryqin në dorë,
eci mes lagjeve të vjetra të Beratit.
Në Durrës, Vlorë e Sarandë, ceremonia e Ujit të Bekuar u mbajt buzë detit.
“Shëndet për të gjithë dhe një vit i mbarë për të gjithë .
Ja dedikoj xhaxhait tim për shkak se para një viti ai ndërroi jetë,” thanë ata.
Në Lushnje, kryqi u hodh në Lumin Seman nga ku për të katërtin vit radhazi, e nxorri i riu Ornel Bushi.
“Ju uroj të gjithëve një vit të mbarë!
Është hera e katërt që e kap unë kryqin, është bërë si dhunti. Zoti qoftë mbi të gjitha,” tha ai.
Ceremoni të ngjashme u zhvilluan në të gjithë vendin.
Dita e Ujit të Bekuar simbolizon pagëzimin e Jezu Krishtit në ujërat e lumit Jordan nga Joan pagëzori.
Uji i Bekuar që shpërndahet në kisha, përdoret nga besimtarët për të sjellë fat dhe mbarësi në shtëpitë e tyre.
