Rusia thotë se SHBA po "i hedh benzinë zjarrit" me armët për Ukrainën
Nga OraNews Përditësimi i fundit 1 Qershor 2022, 18:45
Rusia kritikon planet e SHBA-së për të dërguar sisteme më të avancuara artilerie në Ukrainë, duke akuzuar Uashingtonin se "po i hedh benzinë zjarrit".
SHBA po “i hedh benzinë zjarrit” duke furnizuar me armë Kievin, tha zëdhënësi i Kremlinit Dmitry Peskov në përgjigje të vendimit të presidentit amerikan Joe Biden për të ofruar sisteme më të avancuara raketore në Ukrainë.
“Ne besojmë se Shtetet e Bashkuara me qëllim dhe me zell po i hedhin benzinë zjarrit”, u tha Peskov gazetarëve në një konferencë.
"Furnizimet e tilla nuk kontribuojnë në gatishmërinë e udhëheqjes ukrainase për të rifilluar negociatat e paqes", shtoi ai.
Presidenti Biden e njoftoi masën më herët, por hodhi poshtë frikën për një konflikt të drejtpërdrejtë NATO-Rusi.
Ai tha se qëllimi ishte të ndihmonte Ukrainën të mbrohej dhe se Uashingtoni nuk po e inkurajonte Ukrainën të sulmonte përtej kufijve të saj.
Ndërkohë, një zyrtar në qytetin lindor të Severodonetsk thotë se forcat ukrainase tani kontrollojnë vetëm 20% të territorit atje.
Por ndërsa Rusia synon përpjekjet e saj në lindje, Presidenti Zelensky thotë se Ukraina po bën përparime në terrenet e betejës diku tjetër në vend.
