FSHF përgatit ndryshimet e mëdha në futbollin e erës së re
Nga OraNews Përditësimi i fundit 29 Prill 2022, 11:37
E premtoi Armand Duka gjatë fushatës dhe ka nisur konkretisht puna me hapa konkretë. FSHF do të bëhet shumë shpejt me një rregullore të re që do të reflektojë dhe mbështesë reformat në organizmimin e futbollit shqiptar për masivizim, edukim, infrastrukturë, në futbollin e vajzave dhe mirëqeverisje.
Për të vënë në jetë projektin e ri bazuar në ndryshimet e rregullores, Komisioni i Posaçëm për Reformimin e Rregulloreve të FSHF i krijuar me vendim të Komitetit Ekzekutiv ka nisur nga puna, duke zhvilluar mbledhjen e parë.
Sipas FSHF-së, komisioni i përbërë nga Abdyl Kuriu, Koço Kokëdhima dhe Aldi Topçiu do të rishikojë rregulloret, kodet dhe udhëzimet e FSHF në çdo nivel me qëllim hartimin e një reforme në formatin e aktiviteteve futbollistike dhe rregulloreve përkatëse.
“Për t’i arritur këto qëllime u propozua të ndiqen këto hapa: Së pari, të studiohen pikat e forta dhe të dobëta të formateve aktuale të garave. Së dyti, të krahasohen formatet aktuale me ato të vendeve më të zhvilluara nga ana e futbollit. Së treti, të hartohet një propozim fillestar për këto kompeticione. Së katërti, (dhe kjo mund të bëhet njëkohësisht) të ketë konsultime me grupet e interesit përpara se t’ia dërgojmë propozimin Komitetit Ekzekutiv.
Gjithashtu, Komisioni zhvilloi një mbledhje të përbashkët me Komisionin e Përhershëm të Futbollit të Femrave. Për Komisionin e Futbollit të Femrave ishin prezent znj. Anila Basha, znj. Herjeta Deliaj dhe znj. Keida Ushtelenca, ndërsa temat e diskutimit në mbledhje ishin këto: ndryshimi i formatit të garës, duke krijuar një Kampionat Kombëtar Femrash me 6 (gjashtë) ekipe; krijimin e një Kampionati Kombëtar Femrash të Kategorisë së Parë; ndryshimi i rregullores së aktivitetit; ndryshimi i rregullores së licencimit, duke vendosur si kriter pasjen e të paktën 2 ekipeve moshash për femra (U13-U15-U17); të rishikohet skema e subvencionimit të futbollit të femrave, duke u përshkallëzuar mes Kategorisë Superiore dhe Kategorisë së Parë; statusi i lojtareve femra (Amatore ose Profesioniste); nevoja për infrastrukturë të posaçme për vajzat; vëmendje të shtuar për aspektet sociale/psikologjike të vajzave; mbulim mediatik i procesit me qëllim rritjen e ndërgjegjësimit.
Hapat për mbledhjen e radhës do të jenë zhvillimi i seancave dëgjimore për Klubet e mundshme pjesëmarrëse për Kategorinë Superiore dhe Kategorinë e Parë si edhe bërja e një studimi/redaktimi i Skemës së Incentivimit të Futbollit të Vajzave;
Sakaq, Komisioni i Posaçëm për Reformimin e Rregulloreve të FSHF zhvilloi edhe një tjetër mbledhjen me Komisionin e Ligave dhe Garave, ku prezent ishin z. Gerald Burba dhe z. Florian Mema.
Ne këtë mbledhje u diskutuan një sërë çështjesh, ku më kryesoret ishin nevoja për rritjen e cilësisë se Kampionateve të Moshave; skema e Futbollit Profesionist (Kategoria Superiore dhe Kategoria e Parë) të riprodhohet në të gjitha qelizat e futbollit të organizuar nga U-13 deri në U-21; nevoja për rritjen e cilësisë se gjykimit; Nevoja për përmirësimin e infrastrukturës; vendosja e kriterit sportiv te licencimit për pasjen e një ekipi U-21.
Mbledhja e radhës e këtij komisioni u caktua për t’u zhvilluar ditën e mërkurë më datë 04.05.2022”, theksohet në komunikatën e publikuar nga FSHF.
