Liverpool “zbërthen” Villarreall-in, Klopp nuk lejon të përsëritet Mynihu në “Anfield” (Video)
Nga OraNews Përditësimi i fundit 27 Prill 2022, 22:59
Vendosin Estupinan, Mane dhe një Liverpool në formatin stratosferik. Villarreal dorëzon pa kushte armët në “Anfield Road” ku tentoi të kopjonte ndeshjen e Mynihut me mbrojtje të ngjeshur dhe kundërsulme të rrezikshme, por Jurgen Klopp dhe banda e tij kishin ndërtuar një strategji me agresive për të konkretizuar në raste dhe me një fitore volumin e madh të lojës në ndeshjen e parë gjysmëfinale të UEFA Champions League.
Në Angli nuk pati histori për “nëndetësen” që nuk doli asnjëherë në sipërfaqen e bregdetit në brigjet perëndimore të Britanisë ku të kuqtë vendosën në kornizë një fitore të pastër 2-0 që i avantazhoin dukshëm në takimin e kthit pas një jave.
Henderson zhbllokoi në pjesën e dytë i ndihmuar edhe nga prekja e fatit që e çoi topin në trupin e Estupinan i cili e devijoi në portë dhe pas atij goli, Villarreal u zhbalancua duke lejuar më shumë hapësira për sulmin e Liverpool ku Mane me instiktin vrarës në limitet e pozicionit jashtë loje, vendosi në kasafortë fitoren që i jep Liverpoolit një avantazh moral dhe konkret për të prekur me njërën dorë finalen e Parisit.
