Studenti thotë se do të bojkotojë mësimin për të mos bërë vaksinën
Nga OraNews Përditësimi i fundit 21 Shtator 2021, 08:55
Shyqyri Myrtollari është një student dhe aktivist, i cili thotë se do të heqë dorë nga studimet për të mos bërë vaksinën e Covid-19.
Në një intervistë për "Ditë e Re" ai thotë se vaksinimi i detyruar është i paligjshëm, për deri sa nuk është vendosur me VKM.
Ai shton se studentët janë nën presionin e deklaratave që kryeministri bën në media.
Një arsye tjetër e bojkotimit të mësimit, sipas studentit është se vaksina ndodhet ende në fazë eksperimentale dhe se nuk ka garanci nëse kjo e fundit është e sigurt për shëndetin apo jo.
"Për mendimin tim është e paligjshme, është presion, deri në momentin që nuk është bërë ligjore dhe nuk është shkruar në fletoren zyrtare. Studentët janë detyruar nga fjalët e kryeministrit në media, sepse asgjë nuk është bërë ligjore. Jemi në fazën e një presioni. Nuk jam i vetmi që do pezulloj studimet dhe do bojktoj mësimin akademik, ndonëse jam i pari që e bëj publike."
Arsyet pse studenti refuzon vaksinimin:
"Jemi në fazë eksperimentale, nuk e dimë ende nëse do bëjmë 1 dozë, 2 apo 3. Në një vit e gjysmë kemi marrë informacion mjaftueshëm se fëmijët dhe të rinjtë janë më pak të rrezikuar. Ne nuk kemi siguri nëse vaksina na mbron. Nuk e marrim parasysh imunitetin natyror. Këto janë vendime të nxituara. Do isha i gatshëm të bëja tampon çdo ditë për të shkuar në shkollë", shprehet studenti.
