Vrau gruan afër Gjykatës, avokati: Po përjetonte keq ndarjen, krimi në gjendje të rënduar psikologjike
Nga Edisona Skënderi Përditësimi i fundit 8 Maj 2021, 13:30
Gjykata e Elbasanit ka vendosur “Arrest me burg” për ish-policin Koço Buzo i cili qëlloi për vdekje dy ditë më parë bashkëshorten e tij Liljana Buzo, 54 vjeçe, ndërsa plagosi dy persona të tjerë.
Prokurori Petref Asllani kërkoi masën "Arrest me burg" dhe këtë masë la në fuqi edhe gjyqtari Bujar Musta.
Bajram Kllogjeri, avokati i të pandehurit e ka pranuar masën e dhënë nga Gjykata duke e cilësuar mjaft të rëndë krimin e kryer nga klienti i tij.
Ai ka theksuar se klienti i tij e ka kryer krimin në një moment të rënduar psikologjik, pasi që nga koha kur gruaja i kishte thënë që do të divorcohej e kishte përjetuar mjaft keq.
Ndërkohë vetë autori nuk ka komentuar asgjë para trupës gjykuese. Në gjendje të rëndë për ngjarjen e ndodhur ai edhe në dëshminë e parë në polici ka qenë i kursyer në deklarata, teksa ka theksuar vetëm se “I pata thënë që nuk ke për t'u ndarë prej meje,por ajo donte të më fuste në burg, pasi unë isha xheloz."
Seanca u zhvillua me dyer të mbyllura , sikurse e parashikon kodi për raste të tilla që kanë të bëjnë me konflikte familjare.
Ndërkohë, ngjarja e rëndë ndodhi më 6 maj pranë Gjykatës së Elbasanit, ku do të vendosej për divorcin e çiftit që kishte prej vitesh konflikte. Ngjarja mund të kishte qenë edhe më tragjike nëse një qytetar i cili bëri të mundur neutralizimin e autorit nuk do të kishte ndërhyrë .
Viktima Liljana Buzo ishte larguar që nga fillimi i këtij viti nga shtëpia, për shkak të dhunës së vazhdueshme psikologjike e fizike të ushtruar nga bashkëshorti i saj, Koço Buzo.
Dhuna disa vjeçare ndaj saj ishte ushtruar në sy të fëmijëve të saj, ndërsa gjendja e tij ishte rënduar edhe më shumë pas vdekjes së djalit pak vite më parë.
Ndaj Koço Buzos rëndon akuza "vrasje me paramendim" dhe "plagosje me dashje", pasi krimi i kryer prej tij ka qenë i mirë-menduar. Çifti ka tre fëmijë, dy djem ndërsa vajza ndodhet jashtë me familjen.
