Berisha takon presidentin e Azerbajxhanit, në fokus gazifikimi i Shqipërisë
Nga OraNews Përditësimi i fundit 8 Prill 2013, 10:28
Kryeministri Berisha ka kërkuar ndihmën e qeverisë së Azerbajxhanit për hartimin e një masterplani për gazifikimin e Shqipërisë.Në një takim me Presidentin e Azerbajxhanit, Ilham Aliyev, në Pallatin Presidencial, në Baku, kryeministri Berisha iu referua edhe projektit të gazsjellësit trans- Adriatik TAP duke e cilësuar atë si projektin më fizibël, më ekonomik dhe me tregun më të gjerë edhe më të garantuar.Kryeministri Berisha e njohu presidentin Aliyev me marrëveshjet trilaterale të firmosura nga Shqipëria, Italia dhe Greqia, ratifikimin e tyre nga Shqipëria dhe vendosmërinë e Shqipërisë për të përmbushur me përkushtim detyrimet që rrjedhin nga këto marrëveshje dhe të gjitha detyrimet kontraktuale të këtij projekti.Kryeministri Berisha e njohu Presidentin Aliyev me interesin e madh që tregojnë për projektin TAP vendet e tjera të Ballkanit. Presidenti Aliyev theksoi se gjatë muajve që vijnë konsorciumi Shah Deniz 2 do të vendosë për projektin që do të përzgjedhë për transportin e gazit Kaspik në Evropë dhe, sigurisht, kriteret ekonomike dhe të tregut do të kenë një rëndësi parësore në vendimin e tyre.Ndërsa nga ana e tij, Presidenti Aliyev premtoi mbështetjen e plotë të vendit të tij për hartimin e masterplanit te gazifikimit të Shqipërisë dhe zbatimin e këtij projekti nga ndërmarrjet azere.Në këtë takim, Presidenti Alyiev dhe Kryeministri Berisha shprehen kënaqësinë për progresin e shpejtë të marrëdhënieve miqësore midis dy vendeve dhe kombeve tona, si dhe vendosmërinë për zhvillimin e tyre të mëtejshëm dhe të gjithanshëm. Kryeministri Berisha e siguroi Presidentin Aliyev për mbështetjen e tij dhe të qeverisë shqiptare për investitorët azer të interesuar për të investuar në Shqipëri.Në takim u diskutua për bashkëpunimin në fushën e turizmit, energjisë së rinovueshme dhe në të gjitha fushat me interes të përbashkët.Kryeministri Berisha ftoi Presidentin Aliyev për të vizituar Shqipërinë në kohën më të shpejtë e më përshtatshme për të dhe Presidenti Aliyev e pranoi më kënaqësi ftesën.
