KOKSH: Ligj për të ndëshkuar penalisht sportistët që dopohen
Nga OraNews Përditësimi i fundit 11 Dhjetor 2014, 19:17
Komiteti Olimpik Kombëtar Shqiptar ka kryer një mbledhje urgjente pas ngjarjeve të fundit, ku Daniel Godelli, Hysen Pulaku dhe Romela Begaj rezultuan pozitiv në analizat e antidopingut në botërorin e Kazakistanit.Kryetari i Komitetit Olimpik Kombëtar Shqiptar, Viron Bezhani, shprehu të gjithë shqetësimin e institucionit që ai drejton, duke kërkuar nga Federata Shqiptare e Peshëngritjes një shpjegim sa më të detajuar.“Komiteti Olimpik Kombëtar Shqiptar shprehet shumë i shqetësuar ndaj situatës se krijuar javën e fundit, me 3 raste e dopingut në sportin e peshëngritjes, sidomos kur bëhet fjalë për 3 peshengrites, fitues të medaljeve Botërore dhe Europiane.Për këtë arsye, Komiteti Ekzekutiv i KOKSH i kërkon me urgjencë një informacion sa më të detajuar Federatës Shqiptare të Peshëngritjes në lidhje me çështjen në fjalë, për përdorim substancash të ndaluara nga sportistët e dyshuar”.Më tej Bezhani kërkoi hartimin nga shteti të një ligji që të ndëshkojë penalisht të gjithë ata sportistë që dopohen.“Duke patur parasysh gjendjen e krijuar në peshëngritjen shqiptare për shkak të dopingut, pasi ky fenomen prej vitesh po shfaqet në këtë sport, mendojmë se duhet të mblidhet urgjentisht si Ministria e Arsimit dhe Sportit, Ministria e Brendshme ashtu dhe Ministria e Shëndetësisë për ta futur përdorimin e dopingut nga sportistët në sport në kodin penal, si një vepër të dënueshme ligjërisht nga shteti”.Rastet e fundit shënuan një nga ngjarjet më të errëta në historinë e sportit shqiptar, ku zhgënjimi është absolut pas entuziazmit që me të drejtë shoqëroi ato triumfe, e që me sa duket po rezultojnë në mashtrime të patolerueshme.
