Shpif, shpif… e ç’të bësh tjetër!
Nga OraNews Përditësimi i fundit 23 Janar 2013, 11:03
Partia Socialiste duket se këtë fushatë, si alternativë të saj, do të na ofrojë vetëm fëmijët e Kryeministrit! Prej disa javësh tellallët e Edi Ramës, të të dyja gjinive dhe shumë fytyrave, po riciklojnë denoncimet e bëra njëherë publike më 2007-n! Është interesant po të ndjekësh televizionet dhe të lexosh gazetat se si akuzat e ricikluara paraqiten si lajme dhe si zbulime nga media, e cila nuk bën as më të voglin mundim për të fshehur mbështetjen pa doganë për zotin Rama. Nuk e dija që akuzat qenkan si vera. Sa më të vjetra, aq më të vlefshme.Fakti që zoti Rama nuk i përdori akuzat ndaj znj. Argita Berisha 4-5 vjet më parë, në fushatën e vitit 2009, por e ka nisur këtë fushatë me shpifje, dëshmon se i mbyturi kapet jo vetëm pas fijes së kashtës, por edhe pas akuzave të ricikluara. Zoti Rama thjesht po parathotë se nuk ka ide, nuk ka program (jo 1000 faqe, por nuk paska asnjë paragraf)! I kapur me pallat në dorë, në një konflikt të hapur interesi, ku njëra dorë firmos lejen dhe tjetra përkëdhel bashkëshorten, zoti Rama po furnizon me shpifje mediat! Në fushatën e ardhshme zoti Rama nuk ka çfarë u ofron shqiptarëve për rrugët, sepse PD në 8 vjet ndryshoi jo gjendjen e rrugëve, por gjeografinë e Shqipërisë; nuk ka çfarë u ofron për arsimin, se PD dyfishoi rrogat e arsimtarëve dhe çoi edukimin në hapa cilësorë; nuk ka çfarë u ofron për bujqësinë, sepse edhe një herë që del në fshat, e ka mendjen të bëj foto gomarësh; nuk ka çfarë ofron për integrimin, se është bllokuesi që në histori është në garë vetëm me Neronin. Zoti Rama ka ofruar vetëm rritje taksash. Këtu është i sinqertë dhe i besueshëm. E ka treguar se e bën realitet rritjen e taksave. E ka bërë disa herë kur ishte në krye të Bashkisë së Tiranës. Ka edhe një premtim tjetër: nuk do të ulë rrogat dhe pensionet! Këto janë deklarime publike. Në mungesë të ofertës politike, zoti Rama duket i angazhuar për të ofruar shpifje. Shpifje me idenë se, sidoqoftë, diçka do të ngelet!Gjithë këto ditë kam lexuar me kureshtje se mos gazetarët shkonin pak përtej “lajmeve” që prodhon Taulanti me shokët e shoqet e tij. Për shembull, si lexues më ka bërë përshtypje se pse media, kaq e kujdesshme për të fryrë tullumbace elektorale, nuk bën përpjekjen më minimale për të parë se çfarë qëndron pas së ashtuquajturës aferë me të bijën e Kryeministrit?! Nga ajo që transmetohet, pa shkuar më tej, shohim një korrespondencë në e-mail (privat) mes z. Banaj dhe biznesmenit që do të investonte miliona me adresë yahoo… ! Z. Banaj, ambasadori Shqipërisë në Mbretërinë e Arabisë Saudite, nuk ka përdorur mjete zyrtare, komunikon si njeri privat me një njeri të interesuar për të bërë biznes në Shqipëri. Media e zotit Rama qëllimisht bën lidhje sikur z. Banaj qenka ambasadori ynë në Pakistan. Më e bukura është se e gjithë “historia” po shitet sikur ka ndodhur! E vërteta është se jo që nuk është realizuar asgjë nga çfarë shpifet, por i ashtuquajturi biznesmen që po luan në sulm për Partinë Socialiste nuk ka paguar as punën e bërë nga studioja ligjore! Njeriu që nuk ka shpenzuar asnjë cent dhe që është borxhli, bërtet se “desh më grabitën… on line”. Nuk po hyj në detaje dhe as po bëj google për këtë histori, se këtë mund ta bëjnë gazetarë dhe kushdo tjetër i interesuar, por më bën përshtypje këmbëngulja për t’i qëndruar me forcë një gënjeshtre dhe një sajese që nuk qëndron dot më këmbë sado ta mbajë nga krahët Taulanti me shokët e tij.Përsëritja e një gënjeshtre, fryrja e saj, të kujton proverbin e vjetër: “Shpif, shpif se diçka do të mbetet”. Për fat shqiptarët kanë veshë për të dëgjuar, kanë sy për të parë dhe e shohin humnerën që ndan fjalët që vijnë nga selia rozë me veprat. Në një moment sinqeriteti, një zyrtar i lartë dhe deputet i PS-së, live në televizion, tha se “kur të vijmë ne do të vjedhim me marifet”.Të mësuar me grabitje dhe gjoba, Rama me zëdhënësit e tij çuditen se në një shoqëri të lirë, njerëz në profesion të lirë punojnë dhe fitojnë. Janë me qindra mijëra shqiptarë që punojnë në privat dhe gëzojnë frytet e punës së tyre. Janë mijëra shqiptarë që gëzojnë banesat dhe vilat e tyre. Por Rama, përmes zëdhënësve të tij, bën këtu të paditurin me pyetjen: si ka mundësiiii?E gjithë kjo histori e ka një shpjegim.Zoti Edi Rama i mat të tjerët me metrin e vet. Përderisa ai ka qenë në pushtet për 11 vjet si kryetar bashkie, dhe jo vetëm, ai e di se çfarë ka bërë, mendon se gjithkush është në pushtet duhet të bëjë pasuri duke abuzuar me postin! I kapur me pallat në dorë, zoti Rama tregon përralla me shtëpi dykatëshe që paska edhe tri kate papafingo, që e kanë ndërtuar dy pensionistë dhe në të banojnë tre veta! Dy pensionistë që ngrenë pallatin 5 kate duhen shpallur, e pakta, shenjtorë, se në mungesë të faturave, vetëm me frymë të shenjtë mund të ngrihet pallati. Kjo po, kjo është e bukur për gazetarët. Nuk kanë nevojë të lodhen për të parë e-mail-e dhe për të bërë google. Bujrëm! A ekziston pallati? Ka 2 apo 6 kate? Kush e ka bërë? Sa veta jetojnë? Si ndodh që nga lulishte u bë truall ndërtimi? Edhe pse zonja Rama, si “tironse” e shtresës së mesme me të ardhura nja 60 milionë lekë, beson se njerëzit e besojnë – kjo histori është shumë e trashë për ta treguar.Zotit Rama nuk i duhet vënë shumë faj. Është në fushatën e tij të fundit elektorale. Nuk janë të panjohura veprimet e një njeriu në dëshpërim. Nuk e ka për herë të parë. Të gjithë shohin ëndrra, dhe është një gjë njerëzore, por zoti Rama sheh në ëndërr veten Kryeministër me sy hapur… dhe shpreson se kjo ëndërr do të bëhet e vërtetë. Në fakt, kjo ëndërr mund të bëhet e vërtetë vetëm atë ditë kur shqiptarët të besojnë se pallatin 5-katësh të bashkëshortes së tij e kanë ndërtuar dy pensionistë!Burimi: panorama.com.al
