Shkup, dhjetëra policë dhe protestues të plagosur
Nga OraNews Përditësimi i fundit 25 Dhjetor 2012, 11:09
Ministria e Brendshme e Maqedonisë ka bërë të ditur se dhjetëra policë dhe qytetarë janë plagosur në protestat e djeshme të opozitës dhe përkrahësve të qeverisë në Shkup.Sipas MPB-së, janë regjistruar disa incidente, ku janë plagosur 11 pjesëtarë të policisë dhe disa protestues.Policia gjithashtu në veprimet e djeshme ka arrestuar edhe disa persona të dyshuar për sulme dhe ndalim të personave zyrtar, kryesisht ndaj policisë.MPB ka bërë të ditur se gjatë ditëve të ardhshme do të verifikohen dhe shikohen të gjitha xhirimet për protestat dhe se do të ndërmerren masa për personat e përfshirë në dhunë.Ministria e Brendshme ka përshkruar edhe situatën brenda Parlamentit lidhur me tërheqjen e deputetëve të opozitës nga salla e Parlamentit.“Gjatë kryerjes së detyrës një pjesë e punonjësve të sigurimit janë ankuar se jo vetëm që janë ndaluar në kryerjen e detyrës së tyre, por ata kanë qenë pre e sulmeve fizike nga ana e disa deputetëve. Megjithatë shërbimi i sigurimit ka arritur që në mënyrë të përmbajtur të reagojë duke respektuar standardet profesionale”, theksohet në njoftimin e MPB-së, duke theksuar se do të vazhdojë siguria dhe përkujdesja për institucionet e vendit.Nga ana tjetër, edhe opozita ka bërë të ditur se në protesta janë rrahur nga policia dhjetëra protestues, ndërsa sipas tyre më keq kanë pësuar edhe deputetët e tyre që siç thuhet janë tërhequr zvarrë nga salla e Parlamentit.
