Shtyhet vizita e Ramës në Beograd, lajmin e konfirmon për Ora News Ambasadori serb
Nga OraNews Përditësimi i fundit 13 Shkurt 2014, 22:02
Kryeministri Edi Rama nuk do vizitojë Beogradin brenda muajit shkurt ashtu siç ishte parashikuar. Vizita në Beograd do të shtyhet për shkak të zgjedhjeve të parakohëshme parlamentare në Serbi.Lajmi e ka konfirmuar për mikrofonin e Ora News, ambasadori i Serbisë në Tiranë, Miroljub Zariç, i cili thotë se kreu i qeverisë shqiptare do të qëndrojë në në kryeqendrën serbe pas formimit të qeverisë së re.“Vlerësojmë iniciativën e Kryeministrit Rama për të vizituar Serbinë. Ai është i mirëpritur në Serbi. Kjo vizitë mund të realizohej me para, por tani kemi zgjedhjet parlamentare. Pas krijimit të qeverisë së re ne do të organizojmë vizitën e Kryeministrit Edi Rama në Serbi. Pa dyshim që ne kemi interes për marrëdhënie të mira me qeverinë"theksoi ai.Kryeministri, Edi Rama është Kryeministri i parë shqiptar që viziton zyrtarisht Beogradin pas 68 vitesh. Më 23 qershor të vitit 1946, Enver Hoxha shkeli në Beograd për herë të parë si Kryeministër i Shqipërisë.Në vitin 1946 vendet nënshkruan marrëveshje të bashkëpunimit ekonomik midis dy vendeve dhe vendosën të nënshkruhet një traktat miqësie dhe ndihmë reciproke në raste agresioni territorial nga ana e Greqisë.
