Berisha në Librazhd, shikon mozaikun e pavarësisë

Nga OraNews Përditësimi i fundit 25 Nëntor 2012, 13:53

Pas festimeve të 100-vjetorit në qytetin e Elbasanit, Kryeministri Berisha u ndal në qytetin e Librazhdit për të vizituar punishten e mjeshtrit gurgdhendës, Gëzim Hidri, i cili ka realizuar mjeshtërisht në një mozaik, flamurin kombëtar, mozaik i cili është realizuar me gurë të përzgjedhur nga vende ku janë zhvilluar beteja për mbrojtjen e trojeve shqiptare ndër shekuj.Kryeministri pasi bëri një apoteozë për simbolin më të çmuar të shqiptarëve, simbol të krenarisë dhe identitetit tonë , përgëzoi artistin Gëzim Hidri për pasionin dhe punën e tij duke e cilësuar një dhuratë që Librazhdi i bën Shqipërisë për 100 vjetorin e Pavarësisë." Ky 100 vjetor ka qenë një moment i madh frymëzimi, ndoshta më i madhi në tërë historinë tonë. Pas 100 vitesh ti qëndis me gurët e kësaj toke, flamurin e Skënderbeut në 100 vjetorin e Pavarësisë, flamur që sot ka pushtuar më shumë se kurrë mendjet dhe zemrat e mbarë shqiptarëve. Flamur që valëvitet sot në çdo zemër shqiptari, valëvitet në dritare, banesa, zyra në të gjitha trojet etnike shqiptare dhe unë dua t'ju përgëzoj ju dhe kjo është dhurata më e bukur e jetës suaj, që ju i bëni  kombit tuaj që Librazhdi i bën Shqipërisë. Ky qëndron dhe do të qëndrojë me dinjitet në shekujt.  Artistë e qytetit tuaj që kanë zgjedhur në këtë 100 vjetor për ti dhuruar vendit një kryevepër artistike të pavdekshme, flamurin kombëtarë në mozaik, i cili do të qëndrojë krenarë në shekuj në muzeun e kombit shqiptarë në muzeun historik si një dhuratë  e çmuar e qytetarëve të këtij qyteti dhe rrethi  të mrekullueshëm, që ka aq shumë kontribute në historinë kombëtare në nderim të këtyre kontributeve, por në nderim të të gjithë shqiptarëve shpirtrat e të cilëve prehen sot të qete në mozaikët e këtij flamuri" tha Berisha.Për ndërtimin e këtij mozaiku është punuar pa ndërprerë për  4 muaj , më qëllim përfundimin e tij para datës 28 nëntor. I kënaqur nga puna e mrekullueshme që është bërë, skulptori Hidri i ka treguar kryeministrit Berisha se ndërtimi i këtij mozaiku ka një domethënie të veçantë. Mozaiku do të jetë një dhuratë për qytetarët e Tiranës në 100-vjetorin e Pavarësisë. Ky mozaik i cili do të çelë edhe festimet e pavarësisë në kryeqytetin shqiptar do të vendoset pranë Urës së Tabakëve