Pas tri ditësh protesta, dogana kosovare çliron tregëtarët shqiptarë
Nga OraNews Përditësimi i fundit 29 Gusht 2013, 17:09
Pas tre ditësh është rikthyer normaliteti në pikën kufitare të Morinit ku më shumë se 150 subjekte biznesi protestonin kundër vendosjes së taksës prej 40 Euro për shërbimin e terminalit.Përfaqësuesit e biznesit janë takuar me shefin e doganave të Kosovës, Lulëzim Rafuna ku dhe kanë aritur marrëveshjen që të veprohet në përputhje me dispozitat ligjore që janë në fuqi."U pajtuam që të gjithë ata që i kanë autorizimet për proçedurat të thjeshtësuara, valide, do të vazhdojnë sipas autorizimeve që i kanë pasur. Të gjithë ata të cilëve ju kanë skaduar afatet ose i kanë të anuluara, të aplikojnë sipas dispozitave ligjore të kodit të doganave dhe akcizës. Dogana do t'i shqyrtojë të gjitha ato kërkesa për autorizime nëse i plotësojnë kushtet sipas kodit. Në rast se i plotësojnë kushtet do të autorizohen në rast se nuk i plotësojnë kushtet, do të proçedohet sipas dispozitave ligjore të mëtejshme, mirëpo ne u pajtuam që malli të fillojë të zhdoganohet", ka thënë Rafuna.Marrëveshjen e ka konfirmuar edhe përfaqësuesi i biznesit, Hysen Gashi."Që nga dita e sotme, proçedura e lëvizjes së mallrave do të lëvizë siç ka lëvizë deri më sot, në rregullshmërinë e arsyeshme ligjore. Do të thotë, që nga ky moment, do të fillojë edhe zhdoganimi i mauneve të cilat janë grumbulluar në pikën kufitare, mes Kosovës dhe Shqipërisë", tha Gashi.Menjëherë pas firmosjes së marrëveshjes mes palëve, ka nisur edhe qarkullimi i automjeteve të bizneseve, të cilat prej tre ditësh qëndronin të palëvizura në pjesën neutrale të kufirit Shqipëri - Kosovë.
