Mos na fajësoni për problemet kufitare të Britanisë së Madhe, thotë Edi Rama për BBC

Nga OraNews Përditësimi i fundit 3 Nëntor 2022, 08:30

Kryeministri i Shqipërisë ka akuzuar Mbretërinë e Bashkuar se po përdor shtetasit e tij si kokë turku për të justifikuar “politikat e dështuara” të saj mbi kufijtë dhe migracionin, raportoi BBC.

Edi Rama foli për BBC në lidhje me Sekretaren e Brendshme Suella Braverman për komentin e saj se fajlët “Britania e Madhe po pushtohet” do të nxiste ksenofobinë.

"Kjo lloj gjuhe nuk është një politikë, nuk është një program," shtoi ai.

Shqiptarët janë tashmë grupi më i madh i atyre që kalojnë Kanalin Anglez me varka të vogla.

Zonja Braverman, e cila tha të hënën se Anglia jugore po përballej me një "pushtim" të emigrantëve, ka akuzuar gjithashtu "shumë" shqiptarë për "abuzim me ligjet moderne të skllavërisë".

Javën e kaluar, deputetëve iu tha se 12,000 shqiptarë kishin mbërritur në MB pasi kaluan Kanalin deri më tani këtë vit, ndërkohë që në vitin 2020 kaluan vetëm 50, raporton BBC.

Nga këta 10,000 ishin burra, të cilët përfaqësojnë 1% të popullsisë së rritur mashkullore të Shqipërisë.

Në një intervistë me BBC Newsnight, zoti Rama tha se komenti "pushtim" i zonjës Braverman ishte "i çmendur" dhe ai e kishte patur "të pamundur të mos reagonte".

Kryeministri Rama tha gjithashtu se: "Nuk bëhet fjalë për një person. Ka të bëjë me klimën që është krijuar dhe me gjetjen e një koke turku për fajësimin e të tjerëve".

“Nuk bëhet fjalë për shqiptarët, as alienët apo gangsterët, por ka të bëjë me politikat e dështuara mbi kufijtë dhe krimin”.

"Kjo lloj gjuhe nuk është një politikë, nuk është një program, nuk është një vizion. Nuk është gjë tjetër veçse nxitja e ksenofobisë dhe synim është veçimi i një komuniteti".

"Unë admiroj gjithçka që përfaqëson Britania. Por me të vërtetë jam i neveritur për këtë lloj politike që në fund është e dënuar të dështojë."

Kjo vjen pasi zoti Rama shkroi më herët në Twitter se Britania e Madhe po "diskriminon" shqiptarët për të hequr vëmendjen nga "dështimet e politikave".

I pyetur për këto komente, Ministri i Emigracionit Robert Jenrick tha se donte një "marrëdhënie produktive" me zotin Rama.

“Por është gjithashtu e vërtetë se Shqipëria është një vend i sigurtë, dhe shumica dërrmuese e njerëzve që vijnë nga Shqipëria janë meshkuj të rinj”, tha ai për ITV.

“Është një shembull i mirë i emigrantëve ekonomikë, të atij lloji që ne si vend duhet të përpiqemi të bëjmë më të mirën për ti frenuar”, shtoi ai.

'Fjala e tmerrshme'

Por duke folur në Sky News, Jenrick tha se Mbretëria e Bashkuar duhet t'u japë përparësi njerëzve të cilët janë në "rrezik të vërtetë".

"Unë dua të kem një marrëdhënie konstruktive dhe produktive me miqtë tanë shqiptarë," tha zoti Jenrick. “Por është e saktë që një e katërta e njerëzve që kanë ardhur me varka të vogla kanë ardhur nga Shqipëria këtë vit dhe NCA, Organizata jonë Kombëtare e Krimit, ka thënë se një pjesë shumë e konsiderueshme e krimit të rëndë të organizuar vjen nga këta individë. "

Të hënën, zonja Braverman ra dakord me sugjerimet e deputetit konservator Lee Anderson se "kriminelët shqiptarë" po largoheshin nga një vend i sigurt për të ardhur në MB.

Ai tha se nëse akomodimi në Mbretërinë e Bashkuar nuk do të ishte mjaft i mirë për ta, ata mund "të hipnin në një gomone dhe të ktheheshin menjëherë në Francë".

Duke shkruar në Twitter, zoti Rama akuzoi Sekretaren e Brendshme për përfshirje në një "retorikë krimi që çon në dënimin e të pafajshmëve".

Komisioneri i Kombeve të Bashkuara për të Drejtat e Njeriut, Volker Türk, ka kritikuar gjithashtu komentet e "pushtimit" të zonjës Braverman, duke thënë se ishte "një fjalë e tmerrshme" dhe politikanët duhej të siguroheshin që gjuha e tyre "të mos i shtonte benzinë ​​zjarrit për çështjet që kanë të bëjnë me qeniet njerëzore".

Për momentin, shumica dërrmuese e atyre që kthehen në Shqipëri janë kriminelë të dënuar që kanë vuajtur dënime me burg, njerëz që do të prisnin të dëboheshin sipas marrëveshjeve të gjata.

Këta nuk janë të njëjtët njerëz që kanë kaluar Kanalin Anglez në muajt e fundit dhe kanë kërkuar azil ose kanë paraqitur kërkesa për trafikim njerëzor.

Ndërsa Home Office e konsideron Shqipërinë si një vend të sigurt, nëse dikush bën një kërkesë të besueshme për azil, duhet të merret parasysh.

Kjo do të thotë që këta individë nuk do të ktheheshin mbrapsht derisa të kenë kaluar përmes sistemit dhe të humbasin çështjen e tyre, një proces ky që mund të zgjasë me vite.

Home Office ka një numër të madh prej 101,000 çështjesh të pazgjidhura azili. Diferenca e mbetur është rritur sepse punëtorët po kërkojnë gjithnjë e më shumë kohë për të vendosur mbi çështjet. Kjo është përkeqësuar për katër vjet,  dhe nuk është e qartë se çfarë kanë bërë katër sekretarët e brendshëm gjatë asaj periudhe për ta rregulluar atë.

Prandaj, ekspertët e politikave të imigracionit dhe kryeministri i Shqipërisë thonë se kriza në Kent është e krijuar nga vetë qeveria.