Akuzat ndaj Metës, Braimllari: Zero shqetësim, shet moral djali i Kristaq Ramës që firmosi varjen e poetit Havzi Nela

Nga OraNews Përditësimi i fundit 30 Korrik 2022, 19:55

Duke e konsideruar një lojë politike të orkestruar nga Rama, Partia e Lirisë nuk ka asnjë shqetësim lidhur me akuzat e Autoritetit të Dosjeve në drejtim të Ilir Metës si bashkëpunëtor i ish-Sigurimit.

Sekretari Organizativ i kësaj force politike, Endrit Braimllari, në një intervistë për Ora News me gazetarin Everest Dedaj thotë se është e turpshme sesi sheh moral djali i Kristaq Ramës, i cili është firmëtari i urdhrit për varjen e poetit Havzi Nela.

Braimllari: Zero shqetësim për këtë çështje. Po lexoja një reagim të kryeministrit dhe është shumë e turpshme, e pamoralshme sesi Edi Rama bën moral kur babai i tij Kristaq Rama ka urdhëruar vrasjen e poetit Havzi Nela në grahmat e fundit të regjimit. Si mund të bëjë moral ky kur babai i tij është pjesë e asaj nemoklature? Është një çështje e manipuluar. Përgjegjësi morale dhe politike kur del kryeministri dhe flet në emër të dosjeve kur babai i tij ka urdhëruar dënimin me vdekje të një poeti të pafajshëm. Ai del pas 36 viteve dhe shet moral në opinion publik dhe bën si i pafajshëm.

Përtej debatit politik, pyetjes nëse ka ardhur koha për deklasifimin njëherë e mirë të dosjeve, ai ka këtë përgjigje.

Braimllari: Aty e kanë ligjin, ligjin e bënë socialistët. Pse nuk e zbatojnë? Pse e përdorin si instrument presioni? Ligji është bërë me ekspertë gjermanë.

Braimllari foli edhe për çështjen e incineratorëve. Votën kundër shkarkimit të Arben Ahmetaj si zëvendëskryeministrit nga deputetët e Partisë së Lirisë ai e argumenton me faktin se kjo aferë shkon përtej emrit të tij.

Braimllari: Çështja e incineratorëve nuk është çështje e izoluar e një apo dy personave, përfshin të gjithë kabinetin. Të gjithë duhet të shkojnë para drejtësisë. Kushdo që ka vendosur firmën në atë çështje duhet të marrë përgjegjësinë e merituar. Por ne shikojmë se nga ana e drejtësisë duhet bërë një punë e thelluar.Kryetari i bashkisë së Tiranës nuk thirret fare, është personi kryesor në këtë çështje. Kryeministri po ashtu. E keni parë si kryetari i bashkisë së Tiranës ka ashpërsuar gjuhën në publik? Pse e bën? Ka një problem shumë të madh se ka firmën e tij në këtë çështje. Do ushtrojmë presion qytetar që të shkojë para drejtësisë.