Vrasja e ish-kreut të OST në Veri, gjykata lë në burg Dorian Keqin, mbyll gojën në gjykatë
Nga OraNews Përditësimi i fundit 28 Korrik 2022, 16:51
40-vjeçari, Dorian Keqi, i vënë nën akuzë për vrasjen e ish-Drejtorit të Operatorit të Trasmetimit të Energjisë Elektrike Saimir Jaku, do të qëndrojë në burg.Ai u njoh këtë të enjte me masen e sigurisë në Gjykatën e Lezhës.
Në seancën e zhvilluar me dyer të mbyllura, ka refuzuar të shprehet në lidhje me akuzat e ngritura ndaj tij, por avokati mbrojtës i caktuar nga shteti ka mohuar që klienti i tij të ketë lidhje me ngjarjen.
Pasi dëgjoi palet gjyqtarja Elsa Ulliri pranoi kërkesën e prokurorit Sabri Kastrati dhe vendosi masen e sigurisë "Arrest në Burg", për 40-vjeçarin Dorian Keqi, ndaj të cilit janë ngritur akuzat "Vrasja në rrethana të tjera cilësuese”, kryer në bashkëpunim dhe "Prodhimi dhe mbajtja pa leje e armëve luftarake e municionit".
Gjatë seances gjyqësore për caktimin e mases së sigurisë nuk ishte i pranishem asnjë nga familjaret e 40-vjeçarit, i cili u arrestua të hënën nga policia e Lezhës, pas urdhër ndalimit që kishte lëshuar prokuroria.
Ai u zbulua në bazë të gjurmeve të gishtave që kishte lënë tek bidoni me benzinë që u gjet pak metra larg vendit ku autorët kishin djegur makinën pas krimit.
Dorian Keqi dhe persona të tjerë që kanë bashkëpunuar me të, dyshohet të jenë paguar nga një grup kriminal për të kryer vrasjen, por deri në këtë fazë hetimesh nuk janë arritur të zbulohen porositësit.
Ish-drejtori OST për Veriun, Saimir Jaku, u ekzektua me 9 shtator të vitit 2016-të.
Ai u sulmua me breshëri automatiku nga dy persona, teksa po pinte kafe në një lokal në Rrëshen bashkë me një mikun e tij i cili nga të shtënat mbeti i plagosur.
Autorët e ngjarjes të cilët mendohet të kenë qenë 3 persona mes të cilëve dhe Dorian Keqi, arriten të largohen me një automjet tip "Benz", i cili pas ngjarjes u gjet i djegur në një fshat të Kurbinit.
Ekzekutimi i Saimir Jakut u pasua me një seri vrasjesh në qytetin e Rrëshenit dhe vende të BE, që mendohet të kenë ardhur se pasojë e përplasjeve të dy grupeve me influencë në Qarkun e Lezhës.
