Bardhi kallëzon në SPAK Veliajn: I ka dhënë tendera një kompanie me rekorde kriminale
Nga OraNews Përditësimi i fundit 28 Korrik 2022, 16:16
Deputeti demokrat Gazment Bardhi ka kallëzuar në SPAK kryebashkiakun e Tiranës, Erion Veliaj dhe zyrtarë të kësaj bashkie për shpërdorim detyre dhe shkelje të barazisë në tendera.
Bardhi bën me dije se bashkia ka kualifikuar dhe shpallur fitues në tenderat e rindërtimit në lagjen “5 Maj” në Tiranë, me vlerë më shumë se 10 milion euro, një kompani në pronësi të një personi me rekorde të rënda kriminale.
Sipas tij, nuk ka asnjë njoftim mbi fazën në të cilën ndodhen hetimet për abuzimin me ligjin nga Erion Veliaj dhe Bashkia Tiranë.
Bardhi: Në emër të Partisë Demokratike më 27 Janar 2022 kam kallëzuar në SPAK Kryetarin e Bashkisë Tiranë Erion Veliaj dhe zyrtarë të tjerë të Bashkisë Tiranë për shpërdorim detyre dhe shkelje e barazisë së pjesëmarrësve në tendera. Në shkelje të ligjit Bashkia Tiranë kishte kualifikuar dhe shpallur fitues në tenderat e rindërtimit në lagjen “5 Maj” në Tiranë, me vlerë më shumë se 10 milion euro, kompaninë “ALESIO – 2014” sh.p.k. në pronësi të një personi me rekorde të rënda kriminale. SPAK ka njoftuar sekuestrimin e kompanisë që ka fituar tenderat e rindërtimit në lagjen “5 Maj” dhe pasurisë së këtij shtetasi. Ndërkohë nuk ka asnjë njoftim mbi fazën në të cilën ndodhen hetimet për abuzimin me ligjin nga Erion Veliaj dhe Bashkia Tiranë. Hetimet gjysmake nuk janë drejtësi, por pandëshkueshmëri.
SPAK duhet të ngrihet në lartësinë e pritshmërive të qytetarëve shqiptarë për ti dhënë fund pandëshkueshmërisë. Zyrtarët publik që kanë abuzuar me ligjin duke fuqizuar me fonde publike persona me rekorde kriminale duhet të mbajnë përgjegjësi penale. Koha është tani, na provoni që të gjithë janë të barabartë para ligjit. Na provoni që askush nuk është mbi ligjin dhe nuk gëzon imunitet për shkak të statusit të tij.
