Varhelyi në Tiranë: Integriteti i gjyqtarëve dhe prokurorëve çelësi për në BE, të ndalen sulmet ndaj tyre

Nga OraNews Përditësimi i fundit 28 Prill 2022, 12:37

Komisioneri për Fqinjësinë dhe Zgjerimin në Komisionin Evropian, Oliver Varhelyi është takuar me trupën e vettingut në Shqipëri duke kërkuar që sulmet ndaj tyre dhe familjarëve të ndalojnë.

Në një takim me anëtarët e KPK dhe KPA, zyrtari i lartë i BE, inkurajoi anëtarët e organeve të rivlerësimit të vijojnë procesin bazuar mbi themelet e forta të punës së bërë, si edhe garantoi mbështetjen e plotë të Komisionit Evropian në procesin e rivlerësimit të gjyqtarëve dhe prokurorëve në Republikën e Shqipërisë.

Kryetarja e Komisionit të Pavarur të Kualifikimit Pamela Qirko nënvizoi se do të vijojë puna me rivlerësimin e gjyqtarëve dhe prokurorëve deri në përmbyllje të procesit, me paanshmëri, integritet dhe profesionalizëm pavarësisht vështirësive.

Varhelyi e cilësoi realizimin e procesit të rivlerësimit një arritje themelore për të ardhmen e vendit.

Në orën 14:00 ai pritet të mbërrijë në kryeministri ku do të zhvillojë një takim "kokë më kokë" me kryeministrin Rama dhe në orën 14:30 do të zhvillojnë një konferencë të përbashkët për shtyp.