Përfitonin prej 5 vitesh ndihmë ekonomike duke mashtruar, e pësojnë 51 persona dhe zyrtarja e bashkisë Vau i Dejës
Nga OraNews Përditësimi i fundit 11 Mars 2022, 09:05
Administratorja sociale e bashkisë Vau i Dejës është proceduar penalisht për veprën penale “Shpërdorimi i detyrës”.
Gjithashtu janë vënë nën hetim 51 shtetas që kanë përfituar ndihmën ekonomike nga kjo bashki, me anë të mashtrimit.
Policia bën me dije se bazuar në informacionet e marra në rrugë operative, kanë organizuar dhe finalizuar operacionin policor të koduar “Mashtrimi”.
Si rezultat i këtij operacioni u proceduan 51 shtetas, të gjithë banues në Vig-Mnelë, Vau i Dejës, për veprën penale “Mashtrimi”. Nga veprimet hetimore ka rezultuar se këta shtetas kanë përfituar me anë të mashtrimit, që nga viti 2017, ndihmën ekonomike që ofron bashkia Vau i Dejës.
Në vijim të veprimeve u procedua penalisht edhe shtetasja R. S., 41 vjeçe, me detyrë administratore sociale në bashkinë Vau i Dejës, për veprën penale “Shpërdorimi i detyrës”, sepse në kundërshtim me ligjin, ka bërë pjesë të skemës së ndihmës ekonomike, shtetasit e lartpërmendur, të cilët kanë qenë jashtë vendit ose nuk plotësonin kriteret për të përfituar ndihmën ekonomike.
Materialet iu referuan Prokurorisë së Rrethit Gjyqësor, për veprime të mëtejshme.
