Incidentet që shoqëruan procesin e votimit në 6 bashkitë e vendit
Nga OraNews Përditësimi i fundit 6 Mars 2022, 17:02
Edhe pse zgjedhje të pjesshme në një numër të administrueshëm parimisht të procesit në 6 bashkitë e vendit nuk ka shkuar si duhej faza e parë, ajo e votimit.
Qendrat u hapën zyrtarisht në orën 07:00 por kutitë jo pasi komisionerët nuk shkuan në kohë dhe në zona të tjera moti jo i favorshëm për infrastrukturën shqiptare u bënë pengesë.
Në raportimet e gazetarëve të Ora News në qendrat e votimit, në shumicën e tyre rezulton se ka pasur vonesa. Në zonën e Dukagjinit u bllokuan rrugët nga bora, në Shalë nuk kishte energji elektrike.
Edhe Dibra pati probleme me vonesat në nisjen e votimit. Në shumë zona të Lurës votimi u bllokua nga bora dhe mungesa e energjisë elektrike.
Në Durrës incidentet kulmuan me denoncimin e koalicionit "Shtëpia e Lirisë" ku një vëzhgues i PS u shfaq në media duke fotografuar kartat e identitetit të votuesve.
Po ashtu në Durrës koordinatorë të PD-së dhe "Shtëpisë së Lirisë" janë konfliktuar para qendrës së votimit.
Në Lushnje mungonte komisioneri i "Shtëpisë së Lirisë", ndërsa nga ky koalicion deputeti Luan Baçi denoncoi parregullsitë e procesit të votimit në një sitë vendore në Lushnje. Ai i bëri thirrje Prokurorisë të nisë hetimet për autorët e këtyre abuzimeve.
Në Vorë veç mungesës së komisionerëve të PD-së, u vunë re skema tradicionale të votimeve shqiptare, ato familjare. Denoncime erdhën edhe nga PD për këtë fakt.
