“Berisha me vullnetarët shëtitës, shërbim Ramës” Basha: Duhet të ishin duke protestuar te “5 Maji”
Nga OraNews Përditësimi i fundit 19 Janar 2022, 15:39
Për kryedemokratin Lulzim Basha, ish-kryeministri Berisha është duke i bërë një shërbimi Edi Ramës, me shfaqje me këto 10 vullnetarë, që shëtisin kudo e protestojnë kundër tij.
Basha për Ora News tha se ata duhet të jenë në krah të demokratëve duke protestuar atje tek “5 Maji”, duhej të ishin me pankarta me deputetët tanë.
Ai shtoi se kjo është një periudhë kalimtare në PD dhe se ajo që është e rëndësishme është që partia të jetë e fokusuar në agjendën opozitare.
Pyetja: Zoti Basha, pamë në seancat e fundit parlamentare që ishte një mbivendosje edhe të agjendës opozitare siç ka qenë këto muaj, pasi thuajse e gjithë vëmendja ka qenë tek ato çfarë ka ndodhur brenda Partisë Demokratike, duke lënë mënjanë një seri reformash apo propozimesh të Partisë Demokratike. Si do t’ia dilni që të riktheni në shinat normale asaj që ju keni propozuar dhe çfarë keni premtuar për të arritur nëpërmjet rrugës së parlamentit?
Lulzim Basha: Siç e thash edhe dje në takimet që pata, qoftë me disa vajza dhe gra të LDG-së dhe disa zonja jashtë strukturave tona, por edhe një takim tjetër që pata me demokratët në Tiranë, do të doja shumë që kjo energji të shkonte aty ku duhet të shkojë për hir të shqiptarëve. Ky është edhe shërbimi më i madh që Sali Berisha i bën Edi Ramës, duke u përpjekur me këto shfaqje, me këto 10 vullnetarë, 15 vullnetarë që shëtisin kudo, të cilët në fakt duhet të jenë në krah të demokratëve duke protestuar atje tek “5 Maji”, duhej të ishin me pankarta me deputetët tanë.
Po kjo është një periudhë kalimtare. Ajo që është e rëndësishme është që ne jemi të fokusuar në agjendën tonë. A kërkon më shumë energji? Sigurisht që po! Kërkon më shumë vendosmëri, kërkon më shumë kohë, por asgjë nuk do të na ndalë apo të në devijojë nga agjenda jonë politike, qëllimi është i qartë, largimi i një pushteti të ardhur jo me votë por me manipulime, hapja e rrugës për legjitimimin dhe demokracinë dhe jo thjeshtë parlamentit dhe të qeverisjes, por të të gjithë institucioneve se vetëm në këtë mënyrë do të kemi një shtet që i shërben të gjithë shqiptarëve dhe jo vetëm një grushti njerëzish dhe në funksion të kësaj janë të gjitha ato reforma që kemi njoftuar në fillim të sesionit parlamentar, Vettingu i Politikanëve, reforma elektorale, reforma territoriale e kështu me radhë.
