U largua nga shtëpia dhe burri bëri denoncim në polici, policia gjen afër një shpelle telefonin e gruas dhe një fletore

Nga OraNews Përditësimi i fundit 25 Dhjetor 2021, 19:34

Një grua dyshohet se i ka dhënë fund jetës në Shkodër duke u vetëhedhur nga një shpellë.

Policia thotë se në Komisariatin e Policisë Malësi e Madhe, shtetasi G. H., banues në fshatin Meshqerraj, Njësia Administrative Gruemire ka bërë kallëzim pasi  bashkëshortja e tij, shtetasja  Sh. H., 48 vjeçe është larguar nga banesa në orët e para të paradites së datës  24 dhjetor dhe nuk është kthyer më.

Duke vlerësuar maksimalisht situatën dhe rëndësinë e saj, shërbimet e Komisariatit të Policisë Malësi e Madhe në bashkëpunim me Forcat Operacionale të DVP Shkodër kanë nisur kërkimet për gjetjen e saj.

Si rezultat i informacioneve të marra në rrugë operative, dhe pas kontrollit në territorin e fshatit Meshqerraj, në afërsi të një gryke (shpellë) janë gjetur telefoni i saj dhe një fletore.

Dyshohet se kjo shtetase të jetë vetëhedhur në këtë grykë dhe për pasojë dyshohet se ka humbur jetën.

Për shkak të territorit  shumë të vështirë nuk u bë e mundur gjetja e saj dhe kërkimet janë ndërprerë, pasi pritet që në vendin e ngjarjes, në orët e para të mëngjesit  të mbërrijë edhe forcat e RENEAS dhe FNSH-së me mjete të specializuara për të bërë të mundur gjetjen e  trupit të shtetases Sh. H.

Nga ana e grupit hetimor, nën drejtimin e Prokurorisë, po punohet për të sqaruar me detaje motivet e kësaj ngjarjeje.