Krishtlindje në mjerim, nëna me dy vajzat e mitura në Vlorë pa asnjë përkrahje, shtyn muajin me 50 mijë lekë
Nga OraNews Përditësimi i fundit 25 Dhjetor 2021, 11:27
Krishtlindja nuk është një festë për të gjithë. Në familjen Lalaj në Vlorë është një tjetër ditë në mjerim. Donika Lalaj e ëma e dy vajzave të mitura, njëra prej të cilave me probleme shëndetësore është e detyruar ta kalojë muajin me 50 mijë lekë.
Gazetari Edi Ruçi, i cili ishte prezent ditën e sotme në banesën e familjes Lalaj thotë se anëtarët banojnë në një shtëpi të rrënuar dhe me lagështi. Shqetësimi më i madh i familjes është shëndeti i kryefamiljares Donika Lalaj dhe vajzës së vogël e cila ka trashëguar nga e ëma sëmundjen e epilepsisë.
Çdo muaj janë të detyruara të udhëtojnë drejt Tiranës për të marrë mjekime dhe për të bërë kontrollet mjekësore. Zonja Donika tregon për Ora News se e ka të pamundur të punojë pasi vuan nga epilepsia dhe i duhet të kujdeset për 2 vajzat e mitura 6 dhe 9 vjeç.
Një tjetër problem që i shtohet familjes është bashkëshorti i zonjë Donika i cili e dhunon, pavarësisht se ajo ka urdhër mbrojtje.
Një muaj më parë, në nëntor asaj i është ndërprerë edhe ndihma ekonomike duke e lënë pa asnjë përkrahje. Pavarësisht ankesave asnjëherë nuk ka marrë përgjigje.
