I kërkuar në Gjermani për trafik droge, malazezi arrestohet në Morinë

Nga OraNews Përditësimi i fundit 23 Tetor 2021, 10:40

Një 35-vjeçar malazez, i shpallur në kërkim ndërkombëtar nga Gjermania për trafikim të narkotikëve, është arrestuar nga policia kufitare në Morinë.

35-vjeçari nga Podgorica është arrestuar në hyrjen e Pikës së Kalimit Kufitar Morinë, ku gjatë përpunimit  dhe verifikimit të të dhënave në sistem ka rezultuar se malazezi është i shpallur në kërkim ndërkombëtar nga Interpol Wiesbaden Gjermani.

Gjykata Laufen ka lëshuar ndaj tij urdhër-arrestin për veprën penale "Trafikim  i narkotikëve, parashikuar nga legjislacioni penal i Gjermanisë. 

I arrestuari është  identifikuar si D.P., 35 vjeç , banues në Podgoricë.

Në përfundim të veprimeve hetimore, specialistët e Sektorit për Hetimin e Krimit në DVP Kukës bënë arrestimin provizor të këtij shtetasi, me qëllim ekstradimin e tij drejt Gjermanisë, mbështetur në “Konventën Evropiane të Ekstradimit” të vitit 1957.