IKMT rrafshon disa ndërtesa në Himarë, banorët: Thanë do pastrojmë, na dhunuan pronën
Nga Edi Ruçi Përditësimi i fundit 5 Tetor 2021, 10:43
Inspektorët e IKMT kanë hasur në rezistencë të martën në Himarë, teksa kishin shkuar për të zbatuar aksionin “ Bregdeti ynë” që ka si qëllim pastrimin e vijës bregdetare nga ndërtimet pa leje. Banorët e zonës kanë pretenduar se ata janë nxjerrë nga banesat me dhunë.
Mjetet e Inspektoritatit Kombëtar të Mbrojtjes së Territorit zbarkuan mëngjesin e së martës në Himarë për të shembur ndërtimet pa leje.
Në ndihmë të IKMT shkuan edhe dhjetëra forca të policisë së Vlorës.
Punonjësit u përballën disa herë me rezistëncën e banorëve, të cilët kundërshtojnë prishjen e objekteve të tyre.
Pronarët e biznesve dhe shtëpive thanë se shembjet janë të paligjshme dhe se disponjnë dokumente për to.
"Kanë bërë azhurnimin këtu, kemi paraqitur dhe dokumentat nga bashkia e Himarës".
"Kanë ardhur me forcë, po na shkulin shtëpitë. E kam blerë me para që në '89."
Ata thanë se nuk janë vënë në dijeni për këtë aksion.
"Më thanë do pastrojnë inertet e lëna nga ajo kohë pa asnjë shkresë zyrtare."
Nga ana tjetër përfaqësues të IKMT deklaruan në përballje me banorët se ata kishin ndërtuar pa leje.
"Më keni dhunuar pronën."
"Je i paligjshëm."
Prishjet në Himarë, vijnë si vazhdimësi e operacionit “Bregdeti ynë” i nisur në qershor të këtij viti, ndërsa aktualisht aty planifikohen të shemben 15 objekte kryesisht bare, restorante njësi metali dhe dërrase.
