"Fresku" si landfill mbeturinash, banorët: Pyesni Erion Veliajn
Nga OraNews Përditësimi i fundit 31 Gusht 2021, 19:13
Hapësirat e gjelbëruara nëpër pallate mbeten vetëm nëpër projekte, pasi situata në terren është ndryshe. Pas meje duket si një landfill, por jo!
Jemi në zonën e 'Freskut', në një lagje tejet të populluar ku banorët ndeshen me këtë situatë.
Në këtë lagje kazanët janë të tejmbushur dhe të papastruar.
Plehrat tashmë kanë filluar të bllokojnë hapësirat e gjelbëra dhe rrugët.
Por kjo nuk është e vetmja rrugë që ka probleme me plehrat.
E njëjta situatë paraqitet dhe në rrugën "Fadil Deliu", "Violeta Manushi" e "Marie Kraja."
Kjo situatë është shndërruar në problematike për banorët e zonës, të cilët me ironi thonë se pyetjen duhet t’ia bëjmë kryebashkiakut.
"Shkoni merrni Erion Veliaj tani."
Në kushtet kur pastërtia e mjedisit është parësore për parandalimin e virusit covid-19, kjo situatë duket se nuk po merr zgjidhje.
Inertet e hedhura vend e pavend prej kohësh vijojnë të jenë shqetësuese duke sjellë në zonë një panoramë aspak të denjë për taksapaguesit që edhe pse janë të rregullt nuk marrin shërbimin e duhur, ndërsa bashkia e cila është në dijeni për situatën ende nuk po merr asnjë masë serioze.
