Shijaku “mbytet” nga plehrat, qyteti nuk pastrohet prej 18 gushtit, prag katastrofe mjedisore

Nga OraNews Përditësimi i fundit 23 Gusht 2021, 17:31

Bashkia e Shijakut është në mes të një krize dhe në prag të katastrofës mjedisore. Qyteti dhe zonat përreth nuk pastrohen prej 18 gushtit, pas përfundimit të marrëveshjes provizore me landfillin e Sharrës që tashmë kërkon 29 euro për ton për të pranuar mbetjet.

Shijaku është Bashkia e radhës që zhytet në krizën e menaxhimit të mbetjeve urbane.

Qyteti dhe zonat përreth nuk pastrohen, prej mëngjesit të 18 gushtit.

Kontejnerët e mbetjeve janë plot dhe plehrat kanë mbuluar rrugët e trotuaret.

Qyteti kundërmon erë, ndërsa banorët thonë se po jetojnë mes një katastrofe mjedisore.

"Kam 10 ditë që kam ardhur dhe kështu e kam gjetur. Është skandal i madh, nuk e di i kujt është faji."

Kryebashkiaku, Elton Arbana, thotë se shkak për këtë krizë është bërë përfundimi i kontratës me landfillin e Sharrës.

Deri më 17 gusht, mbetjet e Shijakut trajtoheshin falas, ndërsa sipas marrëveshjes së re, do të kushtojnë 29 euro për ton.

"Mbetjet e Shijakut deri me datë 17 duke gdhirë data 18 gusht, të gjithë mbetjet që gjeneronin nga bashkia e Shijakut janë çuar në landfillin e Sharrës. Prej tre ditësh nuk pastrohen. Janë nëpër kontejnerë dhe pjesa më e madhe e tyre janë nëpër kamionët që bëjnë pastrimin. Maksimumin deri nesër do të marrë zgjidhje pasi do të nëshkruajmë dhe akt-marrëveshjen."

Por kjo kosto konsiderohet e lartë për një Bashki me të ardhura të ulëta si ajo e Shijakut, ndaj nën shembullin e Durrësit pritet të kërkojë ndihmën e qeverisë.

Në mes të sezonit turistik edhe bashkitë e Durrësit, Kavajës dhe Fierit u përballën me krizë të menaxhimit të mbetjeve, situatë nga e cila gjithmonë e më shumë po përfiton landfilli i Sharrës.

Si zgjidhje për situatën e përsëritur që zhyt durrësin në kolaps qeveria miratoi një fond prej 32 milion eurosh mbështetje financiare për menaxhimin/trajtimin e mbetjeve urbane në këtë qark për periudhën gusht-dhjetor 2021 deri në 2030.