Ministrisë së Mbrojtjes dhe të Brendshme i shkurtohen 24 zyrtarë, Kryeministrisë shtohen
Nga OraNews Përditësimi i fundit 16 Mars 2016, 20:10
Kryeministrisë do t’i shtohen edhe dy punonjës të ri, ndërsa Ministrisë së Mbrojtjes do t’i hiqen 14 punonjës. Qeveria mori këtë vendim me propozim të ministrit të Financave për rishpërndarjen e punonjësve të njësisë së qeverisjes qendrore për vitin 2016.“Numri i punonjësve të aparatit të Kryeministrisë shtohet me 2 veta, duke e çuar numrin total të punonjësve të institucionit të Kryeministrisë në 554 punonjës. Numri i punonjësve të Ministrisë së Mbrojtjes reduktohet me 14 veta, duke e çuar numrin total të punonjësve të Ministrisë së Mbrojtjes në 9 196 punonjës.Numri i punonjësve të Ministrisë së Punëve të Brendshme reduktohet me 10 veta, duke e çuar numrin total të punonjësve të Ministrisë së Punëve të Brendshme në 14 162 punonjës”, thuhet në pikën C,Ç dhe D të VKM-së.Gjithashtu, qeveria ka vendosur që numri i punonjësve të Drejtorisë së Përgjithshme Detare shtohet me 20 veta, duke e çuar numrin total të punonjësve të Ministrisë së Transportit dhe Infrastrukturës në 430 punonjës.Ndërkohë, Komitetit Shtetëror të Minoriteteve i shtohen 2 veta, duke e çuar numrin total të punonjësve të institucioneve në varësi të Kryeministrisë në 328 punonjës.Rishpërndarja e numrit të punonjësve i shtrin efektet financiare dhe bëhet efektive në sistemin e thesarit pas hyrjes në fuqi të strukturës së miratuar për institucionet e përmendura në këtë vendim./Ora News/
