Malaj jashtë listave: Vendim individual i Ramës, nuk më zhduk askush nga politika
Nga OraNews Përditësimi i fundit 6 Maj 2013, 22:16
Tashmë s’ka asnjë hamendje, një prej figurave më të rëndësishme të Partisë Socialiste, Arben Malaj është lënë jashtë listës së PS për deputet për zgjedhjet e 23 qershorit. I gjendur përballë këtij fakti, edhe pse jo shumë surprizë për të, Malaj ka vendosur të kandidojë si deputet i pavarur në Vlorë.Në një komunikim për mediat, fill pas daljes nga mbledhja e Kryesisë së Partise Socialiste Malaj tha se vendimi për ta lënë jashtë listës ishte tërësisht individual i lidershipit Rama."Ky nuk është fundi i karrierës sime. Falënderoj të gjithë përfaqësuesit politikë të qarkut të Vlorës. Nuk kam asnjë problem individual me Ramën. E kam ditur që në momentet e para që lufta që kam bërë për të mos ndryshuar Kushtetutën në mënyrë arrogante, e kam ditur që kur i kam kërkuar PS-së të mos bllokonte funksionimin e Kuvendit. Kur kam nisur një proces për modernizimin e PS, e kam ditur që do kem një çmim për këtë. Nuk më zhduk dot asnjeri nga politika. Vendimi është individual i Ramës. Unë nuk mund të tërhiqem nga detyrimi për t’i shërbyer vendit tim. Njëra nga këto është t’i shërbej si kandidat i pavarur. Shumë nga ata që Rama i promovon me parafabrikat, nuk kanë asnjë angazhim dhe kontribut, por thjeshtë që janë të nënshkruar, kishin kohë që dilnin garant se do ta zhduknin Malajn nga politika”-tha ai.Zoti Malaj paralajmëroi një konferencë për shtyp paraditen e nesërme në orën 12:00, ku do të sqarojë të gjithë qëndrimet e tij.Po ashtu jashtë listës së PS-së është lënë edhe një tjetër figurë e njohur e PS-së, Arben Isaraj.
