Koalicionet, krerët e partive të vogla takime në selinë e PD-së

Ndërsa regjistrimi i koalicioneve po shkon drejt limiteve që parashikon kodi zgjedhor dy partitë e mëdha PD e PS kanë intensifikuar takimet me krerët e partive të vogla për të bërë të mundur arritjen e një marrëveshje mes tyre për koalicion parazgjedhor.Kryetarë të disa partive të vogla të djathta kanë zhvilluar sot takime me përfaqësues të lartë të PD-së për të shqyrtuar edhe kriteret për arritjen e një koalicioni parazgjedhor.Kështu kreu i partisë Lëvizja e Legalitetit Ekrem Spahiu, Nard Ndoka i PDK-së, Lufter Xhuveli i partisë agrare ambientaliste, Adriatik Alimadhi i Ballit Kombëtar dhe Edmond Vlashaj, kryetar i lëvizjes Shqipëria e re janë takuar mesditën e sotme në selinë blu me grupin negociator të caktuar nga kryesia, sekretarin e përgjithshëm të PD-së Ridvan Bode dhe shefin e kabinetit të kryeministrit Oerd Bylykbashi ndërsa gjatë orëve të pasdites do të zhvillojë një takim konsultues në selinë blu edhe kreu i PDIU-së Shpëtim Idrizi.Ndërkohë pritet që takimet mes dy negociatorëve të PD-së me krerët e partive të vogla të vijojnë edhe përgjatë pasdites ndërsa pas takimeve konsultative pritet të firmoset edhe një marrëveshje e përbashkët.Më herët në selinë rozë, kreu i PS-së Edi Rama nënshkroi marrëveshjen për koalicion parazgjedhor me PBDNJ-in e Vangjel Dules ndërsa bëri publik edhe emrin e koalicionit i cili do të jetë “Aleanca për Shqipërinë Europiane”.LDK, Lesi: Po shqyrtojmë ofertat e PD e PS, si kryetar zgjedh PDPartia Lidhja Demokristiane  pritet të rikonfirmojë koalicionin me PD. Kështu të paktën ka lënë të kuptohet kreu i kësaj partie Nikollë Lesi, pas një takimi që zhvilloi në selinë blu, ku është njohur dhe me ofertën e PD për LDK.  Duke e vlerësuar të shkëlqyer ofertën, Lesi garantoi se kësaj radhe demokristianët do të jenë të përfaqësuar në parlament.

“Në cilësin e kryetarit të LDK erdha në PD dhe dëgjova ofertën dhe në orën 18:00 është mbledhja e kryesisë së partisë sonë, në të cilën do  të paraqes ofertën e PD. Është ofetë e shkëlqyer dhe demokristianët do të jenë të përfaqësuar këtë radhë në parlament”tha ai.

Duke iu referuar takimit me zotin.Rama, Lesi tha se si ofertat e PS ashtu edhe kjo e PD do të kalojnë në sitën e kryesisë, ndërsa në cilësinë e kryetarit të LDK ai deklaroi votën pro mbetjes në koalicionin e djathtë.

“Unë jam takuar me zotin Rama dhe oferta e PS u shqyrtua nga kryesia e LDK dhe sot bashkë me atë të PD do të shqyrtohen dhe dilet në përfundime, megjithatë për mua me rëndësi është që të ngelemi me këtë koalicion pasi janë forca që ecin përpara. Pra vota ime do jetë pro ofertës së PD dhe si kryetar ka jo pak rëndësi” deklaroi Lesi.

“Unë kam qënë kritik për disa gjëra për qeverisjen sepse vi nga radhët e medias, nëse pas zgjedhjeve të 23 qershorit nuk do jem si përfaqësues në parlament, atëherë do jem në vendin e ndonjërit prej jush”përfundoi ai.

 Bode: PD e hapur për të gjitha partitë e qendrës dhe të djathtë

Dita e nesërme pritet të formësojë përfundimisht koalicionin e djathtë parazgjedhor.  Ridvan Bode, anëtar i grupit negociator të caktuar nga kryesia e PD, njëherësh edhe sekretar i përgjithshëm i kësaj partie tha se momentalisht janë rreth 25 parti që deri tani kanë përfunduar negociatat për koalicion, ndërsa do vijojnë takimet pasditen e sotme dhe nesër për të përfunduar të gjitha negociatat.

“Po kryhen negociata me të gjitha partitë që janë ofruar. Janë rreth 25 parti që deri tani kanë përfunduar negociatat për koalicion. Do vijohet edhe pasdite dhe nesër për të përfunduar të gjitha negociatat. PD është e hapur për të përfshirë në koalicion të gjitha partitë e qendrës dhe të djathtë” tha ai.