Platforma për bisedimet, Hoxhaj: Në bazë të rezolutës
Nga OraNews Përditësimi i fundit 29 Tetor 2012, 14:39
Pas zërave se Prishtina zyrtare nuk ka një platformë për bisedimet me Serbinë, ministri i jashtëm kosovar Enver Hoxhaj thotë se hapat e dialogut do të bazohen në Kushtetutën e Kosovës, Rezolutën e Kuvendit dhe në dokumentet strategjike të qeverisë."Qëllimi jonë është që në këtë proces të normalizohen marëdhëniet mes Kosovës dhe Serbisë si dy shtete sovrane dhe të pavarura. Padyshim se pikënisja e vetme dhe korniza e vetme politike dhe legale për një proces të tillë është Kushtetuta e Kosovës dhe ligjet në fuqi. Kuvendi i Kosovës ka miratuar një rezolutë, e cila në formë dhe në substancë paraqet jo vetëm një konsensus politik mes të gjithë partive politike por është edhe një mënyrë se si ne e shohim procesin e normalizimit të raporteve në mes të dy shteteve të pavarura", thotë Hoxhaj në një intervistë për mediat Kosovare.Sipas shefit të diplomacisë kosovare nga vizita e sekretares amerikane Hilari Clinton dhe shefes së diplomacisë europiane Catherin Ashton priten vetëm sugjerime specifike, por jo temat e dialogut.Hoxhaj thekson se këto bisedime Prishtina ka vendosur vijat e kuqe për temat që janë të mbyllura njëherë e përgjithmonë siç janë: sovraniteti dhe integriteti territorial.
