BE vazhdon të mbajë qëndrim të ashpër ndaj Rusisë
Nga OraNews Përditësimi i fundit 6 Mars 2015, 18:19
Bashkimi Europian do të vazhdojë të mbajë një qendrim të ashpër ndaj Rusisë në lidhje me konfliktin në Ukrainë, por prioritet do të jetë monitorimi dhe sigurimi i armëpushimit të brishtë të arritur në Minsk.Gjatë samitit të ministrave të Jashtëm të Unionit, shefja për politikën e jashtme dhe çështjet e sigurisë, Federika Mogerini, tha se nuk kishte asnjë arsye tani që të lehtësoheshin sanksionet, pavarësisht se në terren ka përmirësime."Jemi në rrugën e duhur me gjithë përpjekjet që po bëjmë në terren, në Kiev me delegacionin tonë, me mbështetjen që po i japim zbatimit të marrëveshjes. Të gjithë ukrainasit e dinë mjaft mirë gjendjen humanitare në lindje të vendit dhe kemi shumë punë për të bërë, por kryesorja tani është të sigurojmë armëpushimin".Ministri i jashtëm gjerman, Frank-Valter Shtajnmajer, tha se vendi i tij po shqyrton mënyrën se si do të ndihmojë OSBE-në për të monitoruar në terren zbatimin e armëpushimit, ndërsa ministri i jashtëm britanik, Filip Hamond, tha se ndaj Rusisë mund të aprovoheshin sanksione të reja nëse konfirmohen shkeljet e marrëvesjes.Britania dhe Shtetet e Bashkuara mbështesin vendosjen e sanskioneve të reja ndaj Rusisë, ndërsa Bashkimi Europian duket më i tërhequr në këtë drejtim dhe kërkon t'i japë një shans zbatimit të armëpushimit.
