Rama me investitorët, premton model ekonomik por jo ulje taksash

Nga OraNews Përditësimi i fundit 28 Janar 2015, 09:04

Qeveria premton se do të dëgjojë më shumë biznesin sa herë  të hartojë politika fiskale por nuk premton ulje taksash. Në takimin me Shoqatën e Investitorëve të Huaj, kryeministri Rama premtoi një model të ri ekonomik që do të diskutohet fillimisht me biznesin, duke i drejtuar një apel investitorëve të huaj të mos hezitojnë të investojnë në Shqipëri. “ Fjala kyçe është të flasim, të dëgjojmë njëri-tjetrin dhe të bashkëpunojmë”.Ka zgjedhur t’i drejtohet kështu kryeministri Rama Shoqatës së Investitorëve të Huaj në Shqipëri. Në një kohë kur ekspertët deklarojnë se investimet e huaja janë tkurrur për shkak të taksave, kreu i qeverisë shqiptare lajmëroi mbledhjen e Këshillit të parë të Investimeve që do jetë një thirje për investuesit që gjithësesi nuk do ketë lehtësira fiskale. “ Viti i kaluar ne na dha një mësim mjaft me rëndësi, mes të shumtëve që morëm. Me qëllim që politikat të jenë efektive, sidomos ato që lehtësojnë dhe i japin mbështetje sektorit ekonomik, na duhet që të hartojmë paketa dhe politika që bazohen në sugjerimet tuaja. Për t'u siguruar që nuk më keni keqkuptuar, përmirësimin i rregullave për mua dhe për ne nënkupton më shumë reduktim rregullash dhe përmirësimi i infrastrukturës tatimore moderne nuk do të thotë që të vendosim apo të rrisim më tej taksat, por që të sigurohemi që infrastruktura të ofrojë gjithnjë e më tepër barazi mes të gjithë tatimpaguesve dhe gjithnjë e më pak informalitet”.Duke folur për një model të ri ekonomik Rama garantoi se themelet do të hidhen në bashkëpunim me botën e biznesit.“E kemi thënë, dhe unë vetë e kam thënë këtu, se mund të tejkalojmë një trashëgimi të rrezikshme ekonomike dhe të hedhim bazat e një modeli të ri ekonomik, vetëm në bashkëpunim me botën e biznesit dhe me partnerët tanë ndërkombëtarë, shumë prej të cilëve përfaqësohen edhe në këtë shoqatë.”Si prova të përmirësimit të klimës së biznesit kreu i qeverisë përmendi hartimin e dy projektligjeve, njëri për investimet, tjetri për turizmin. Në raportin vjetor për Indeksin e Lirisë Ekonomike në botë, Shqipëria  ka pësuar rënie në krahasim me një vit më parë duke paraqitur si problem korupsionin dhe çështjen  e pronave.