Berisha:TAP, projekti më efikas për furnizimin me gaz të BE-së
Nga OraNews Përditësimi i fundit 20 Janar 2013, 10:54
Kryeministri Berisha ka shprehur edhe njëherë angazhimin maksimal të qeverisë shqiptare në mbështetje të projektit të TAP-it, si projekti më efikas dhe eficent i furnizimit të BE-së me gazin azer të Shah Denizit.Në një takim me drejtorin menaxhues të kompanisë së Gazsjellësit Trans Adriatik Kjetil Tungland, kryeministri Berisha theksoi se gazsjellësi TAP ka një rëndësi të jashtëzakonshme për zhvillimin e Shqipërisë dhe të ardhmen e saj si një superfuqi energjetike në rajon, si dhe për punësimin e qytetarëve shqiptarë nëpërmjet krijimit të dhjetëra, mijëra vendeve të reja të punës.“Ky projekt madhështor energjetik, ku do të investohen rreth 2 miliardë euro, do të punësojë, direkt dhe indirekt, mbi 20 mijë qytetarë shqiptarë. TAP, me 140 kilometrat që kalojnë nëpër territorin shqiptar, do të sjellë gazin nga Kaspiku dhe Azia Qendrore në Evropën Perëndimore, si dhe do t’u mundësojë familjeve shqiptare gazin në çdo shtëpi dhe t’u garantojë qytetarëve energji për ngrohje e gatim me koston më të ulët se të gjitha format e energjisë që shqiptarët përdorin sot. Shqipëria, si vend me depo te mëdha natyrale gazi, do të ketë një pozicion shumë të rëndësishëm në shpërndarjen e tij në veri, por dhe mundësi të madhe për fuqizimin e prodhimit dhe eksportit te energjisë ne rajon” theksoi Berisha.Nga ana e tij, drejtori menaxhues i kompanisë së Gazsjellësit Trans Adriatik Kjetil Tungland shprehu mirënjohjen për bashkëpunimin shumë të ngushtë dhe diskutimet konstruktive me përfaqësuesit e qeverisë shqiptare ne konkludim të kësaj marrëveshjeje. Ai gjithashtu informoi Kryeministrin mbi detaje të tjera të përgatitjes së projektit.Takimi mes kreut të qeverisë dhe delegacionit së kompanisë së Gazsjellësit Trans Adriatik u zhvillua në kuadrin e firmosjes së Marrëveshjes Pritëse Qeveritare mes Qeverisë Shqiptare dhe kompanisë TAP, si një dokument themeltar për konsiderim për projektin e Gazsjellësit Trans Adriatik, nga Konsorciumi i Shah Denizit, në Azerbajxhan.Në vijim, pritet që së shpejti të konkludohet edhe Marrëveshja Ndërqeveritare mes Republikave të Italisë, Shqipërisë dhe Greqisë, rreth projektit të TAP-it.
