Nis epoka e taksës progresive, ja sa do të japin për shtetin shqiptarët në 2014-ën
Nga OraNews Përditësimi i fundit 29 Dhjetor 2013, 19:13
Qytetarët shqiptarë gjatë 2014 do të paguajnë më shumë taksa. Paketa e re fiskale e cila u miratua tashmë në parlament parashikon rritje të taksës për disa zëra mjaft të prekshëm për qytetarët.Që nga 1 Janari shqiptarët do të paguajnë në bazë të taksimit progresiv. Efekti i parë i këtij sistemi fiskal është mbi pagat, pasi ata që paguhen më shumë do ti paguajnë më shumë taksë shtetit. Sipas projektligjit një qytetar që merr një rrogë deri në 30 mijë lekë të deklaruar nuk do të përfshihet në taksë. Ata që marrin mbi këtë shumë do të paguajnë 13 % të shumës së rrogës, ndërsa ata punonjës që paguhen mbi 130 mijë lekë do të tatohen rreth 23 % të rrogës që marrin.Impakt të ndjeshëm në xhepat e gjithsecilit pritet të ketë edhe rritja e taksës së qarkullimit që sjell rritje të naftës dhe benzinës me rreth 12 lekë për litër. Ky vendim pritet të reflektohet në të gjitha pikat e karburanteve që prej 1 Janarit e natyrisht edhe në transportin publik.Shqiptarët do të paguajnë më shumë edhe për shtëpitë e tyre, pasi në bazë të ligjit shtëpitë e ndërtuara para 1993 nga 15 lekë që paguanin për metër katror tashmë do të paguajnë 30 lekë.Më shumë para vitin që vjen do të kushtojnë edhe pijet alkolike, pijet energjike dhe cigaret. Biznesi i vogël duket se është më i favorizuari pasi ulen tatimet për biznesin e vogël me 7.5 %, por nga ana tjetër biznesi i madh do të paguajë 50 % më shumë mbi fitimin. Kjo taksë është kundërshtuar shumë prej përfqësuesve të biznesit . Ndërkohë që efektet pritet të pasqyrohen në ulje të investimeve të këtyre kompanive por edhe në ulje të numrit të punonjësve.Sipas ekspertëve rritja e këtyre taksave mund të reflektohet edhe në një ulje të mëtejshme të konsumit duke e vështirësuar edhe më shumë ecurinë ekonomike në tërësi.
