PDIU uron Ditën e Flamurit: Bashkimi kombëtar, motivi i punës sonë të përditshme
Nga OraNews Përditësimi i fundit 28 Nëntor 2013, 17:11
Partia për Drejtësi dhe Integrim ka uruar sot të gjithë shqiptarët në 101 vjetorin e pavërsisë së shtetit shqiptar. Në një deklaratë për mediat, PDIU thekson se Dita e Flamurit është dita e shenjtë e shqiptarëve, që përmbledh aspiratat e pashuara të kombit tonë për liri dhe bashkim kombëtar.“PDIU uron të gjithë bashkëkombasit kudo që ndodhen: Gëzuar Ditën e Flamurit. Data 28 nëntor është dita e shenjtë e shqiptarëve, që përmbledh aspiratat e pashuara të kombit tonë për liri dhe bashkim kombëtar; është data e ngritjes së flamurit të Skënderbeut në Krujë; është data e ringritjes së flamurit kombëtar dhe Pavarësisë së Atdheut në Vlorë nga plaku i urtë Ismail Qemali; është data e nisjes së epopesë legjendare të UÇK-së në Kosovë. Çdo 28 nëntor, të gjithë shqiptarët nga Shqipëria, Kosova, Çamëria, Maqedonia, Presheva, Mali i Zi dhe Diaspora ndiejmë amanetin e rilindasve tanë për bashkimin e atdheut, në kufijtë që delegatët e ardhur nga Preveza në Mollë të Kuqe, shpallën Shqipërinë të lirë dhe të mosvarme; çdo 28 Nëntor çdo shqiptar ndjen triumfin e lirisë së ardhur në kohën e errët të pushtimit nga heroi ynë kombëtar, Gjergj Kastriot Skënderbeu; çdo 28 Nëntor çdo shqiptar ndjen amanetin e luftës për bashkim kombëtar të Ushtrisë Çlirmitare të Kosovës” thekson PDIU.Në vijim PDIU, shton se “në vitin e parë të shekullit të ri të shqiptarëve, ne themi me plot bindje se ka ardhur momenti që asiprata e kahershme për bashkim kombëtar të jetë motivi i punës sonë të përditshme”.“Këto mesazhe të kësaj date të shenjtë duhet të jenë ylli polar i çdo bashkëkombasi dhe i politikës shqiptare në secilin prej shteteve ku padrejtësisht u nda kombi ynë. Sot, në vitin e parë të shekullit të ri të shqiptarëve, ne themi me plot bindje se ka ardhur momenti që asiprata e kahershme për bashkim kombëtar të jetë motivi i punës sonë të përditshme dhe deri sa ky objektiv madhor të arrihet të mos ndalojmë së punuari me frymëzimin e figurave atdhetare të shquara shqiptare. Gëzuar Ditën e Shenjtë të Flamurit; Gëzuar 28 Nëntorin!”
