Meta, Veljanoskit: Shqipëria, vëmendje të veçantë ndaj shqiptarëve në Maqedoni

Kryetari i Kuvendit, Ilir Meta, priti sot Ambasadorin e Maqedonisë në Shqipëri, Stojan Karajanov.Ambasadori Karajanov i përcolli z. Meta letrën e urimit të Kryetarit të Asamblesë së Maqedonise z. Trajko Veljanoski me rastin e marrjes së detyrës së Kryetarit të Kuvendit.Kryetari i Kuvendit Meta shprehu gatishmërinë e tij për forcimin e marrëdhënieve mes Shqipërisë dhe Maqedonisë në të gjitha nivelet, veçanërisht në drejtim të marrëdhënieve ndër-parlamentare.Kryetari i Kuvendit Meta dhe Ambasadori Karajanov biseduan gjithashtu mbi thellimin e shkëmbimeve parlamentare dhe të ekspertizës ligjore, me fokus të veçantë në procesin e integrimit evropian të të dy vendeve dhe në drejtim të thithjes së investimeve të huaja.Meta gjithashtu u shpreh se Shqipëria i kushton vëmendje të veçantë të drejtave të shqiptarëve në Maqedoni, dhe ndau bindjen se shqiptarët janë një kontribut për integrimin e mëtejshëm euro-atlantik të Maqedonisë.

Meta priti gjithashtu edhe Ambasadoren e Republikës Çeke znj. Bronislava Tomášová.

Ambasadorja Tomášová e uroi z. Meta në emër të autoriteteve çeke me rastin e marrjes së detyrës së Kryetarit të Kuvendit dhe shprehu gatishmërinë e Republikës Çeke për t’a mbështetur Shqipërinë, veçanërisht në drejtim të ecurisë së procesit të integrimit evropian të vendit.

 Kryetari i Kuvendit Meta shprehu vullnetin e tij për thellimin e mëtejshëm të marrëdhënieve parlamentare mes dy vendeve dhe theksoi se ekspertiza e Republikës Çeke do të ishte një kontribut i vyer për avancimin e Shqipërisë drejt Bashkimit Evropian.

Duke biseduar mbi zhvillimet politike në vend, z. Meta vuri theksin në rëndësinë e gjetjes së zgjidhjeve konsensuale dhe gjithëpërfshirëse që i shërbejnë dialogut dhe bashkëpunimit politik mes palëve.

 “Puna e Kuvendit do të përqendrohet në rritjen e zbatueshmërisë së legjislacionit dhe në bashkëpunimin konkret me të gjithë aktorët qeveritarë dhe jo-qeveritarë, në interes të përshpejtimit të integrimit evropian të Shqipërisë” – u shpreh z. Meta.